پنجاب اور ملک بھر میں 30 اگست تک شدید مون سون بارشوں کی پیشگوئی

ہفتہ 23 اگست 2025 18:14

لاہور(اُردو پوائنٹ اخبارتازہ ترین - آن لائن۔ 23 اگست2025ء) پنجاب سمیت ملک بھر میں آج سے 30 اگست تک شدید مون سون بارشوں کی پیشگوئی کی گئی ہے۔ نیشنل ڈیزاسٹر مینجمنٹ اتھارٹی (این ڈی ایم ای) نے بارشوں اور ممکنہ سیلابی صورتحال کا الرٹ جاری کیا ہے۔ پنجاب، خیبر پختونخوا، گلگت بلتستان اور آزاد کشمیر میں طوفانی بارشیں متوقع ہیں جبکہ نشیبی علاقوں میں سیلاب اور پہاڑی علاقوں میں لینڈ سلائیڈنگ کا خطرہ بڑھ گیا ہے۔

لاہور، راولپنڈی، ملتان اور فیصل آباد میں فلیش فلڈنگ کا خدشہ ہے، جبکہ پہاڑی ندی نالوں میں طغیانی متوقع ہے۔ تربیلا ڈیم 1550 فٹ کی انتہائی سطح تک بھر چکا ہے اور اس کے سپیل ویز کھول دیے گئے ہیں۔ ڈاؤن سٹریم میں پانی کا بہاؤ 2 لاکھ 50 ہزار کیوسک تک پہنچنے کا امکان ہے۔

(جاری ہے)

دریائے سندھ میں گڈو بیراج کے مقام پر پانی کی سطح بلند ہو گئی ہے جبکہ دریائے ستلج میں پانی کی سطح تیزی سے بڑھ رہی ہے۔

ہیڈ گنڈا سنگھ کے مقام پر پانی کی سطح بلند ہو کر 20 فٹ ہوگئی، متعدد مقامات پر زمیندارہ بند ٹوٹنے سے فصلیں زیر آب آگئیں اور کسانوں کو کروڑوں روپے کا نقصان ہوا۔ ڈی آئی خان میں دریائے سندھ عبور کرتے ہوئے باپ اور بیٹا ڈوب گئے، جن کی لاشیں مقامی افراد نے نکال لی ہیں۔پی ڈی ایم اے پنجاب کا کہنا ہے کہ آج سے پنجاب کے بیشتر اضلاع میں مون سون بارشوں کا 8 واں اسپیل 27 اگست تک جاری رہے گا۔

راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد اور وزیر آباد میں بارشیں متوقع ہیں۔ لاہور، قصور، شیخوپورہ، سیالکوٹ، نارووال، میانوالی، خوشاب، سرگودھا، جھنگ، ننکانہ اور ٹوبہ ٹیک سنگھ میں بھی بارشیں ہوں گی۔ ڈیرہ غازی خان، بھکر، لیہ، ملتان، بہاولپور، بہاولنگر، راجن پور اور رحیم یار خان میں گرج چمک کے ساتھ بارش کی پیشگوئی ہے۔ڈی جی ڈیزاسٹر مینجمنٹ اتھارٹی عرفان علی کاٹھیا نے بتایا کہ دریائے ستلج میں گنڈا سنگھ والا کے مقام پر پانی کا بہاؤ 1 لاکھ 29 ہزار کیوسک تک پہنچ گیا ہے اور بھارت کی جانب سے مزید پانی چھوڑے جانے کا خدشہ موجود ہے۔ متعلقہ اضلاع کی انتظامیہ کو ہائی الرٹ کر دیا گیا ہے۔