پی ڈی ایم اے پنجاب کا دریائے ستلج وندی نالوں میں اونچے درجے کے سیلاب کا الرٹ جاری

جمعہ 22 اگست 2025 19:38

لاہور (اُردو پوائنٹ اخبارتازہ ترین - اے پی پی۔ 22 اگست2025ء) پنجاب ڈیزاسٹر مینجمنٹ اتھارٹی (پی ڈی ایم اے) نے دریائے ستلج اور ملحقہ ندی نالوں میں اونچے درجے کے سیلاب کے خدشہ کے پیش نظر فلڈ الرٹ جاری کر دیا ۔ ترجمان کے مطابق آئندہ 24 گھنٹوں میں دریائے ستلج میں پانی کے بہائو میں نمایاں اضافے کا امکان ہے،جو بھارتی آبی ذخائر سے پانی چھوڑے جانے کے باعث پیدا ہوا ہے۔

ترجمان کے مطابق23 اگست سے ملک کے بالائی علاقوں میں مون سون کے نئے اسپیل کا بھی امکان ہے جس کے اثرات صوبے کے مختلف علاقوں پر پڑ سکتے ہیں۔پی ڈی ایم اے پنجاب نے صوبے بھر کے تمام کمشنرز اور ڈپٹی کمشنرز کو ہنگامی صورتحال سے نمٹنے کے لیے الرٹ رہنے کی ہدایت کر دی ہے۔ ریلیف کمشنر پنجاب نبیل جاوید نے ضلعی انتظامیہ اور ریسکیو حکام کو بھی فوری الرٹ رہنے اور ممکنہ صورتحال کے لیے تمام تر انتظامات پیشگی مکمل کرنے کی ہدایات جاری کی ہیں۔

(جاری ہے)

ڈی جی پی ڈی ایم اے نے لوکل گورنمنٹ، محکمہ زراعت، آبپاشی، صحت، جنگلات، لائیو اسٹاک اور ٹرانسپورٹ سمیت تمام متعلقہ محکموں کو ہنگامی بنیادوں پر متحرک رہنے کا حکم دیا ہے۔انہوں نے ایمرجنسی کنٹرول رومز میں عملے کو الرٹ رکھنے اور شہریوں کو جاری کردہ احتیاطی تدابیر پر عمل کرنے کی اپیل کی ہے۔مزید برآں ڈی جی پی ڈی ایم اے نے دریائے ستلج کے پاٹ میں بسے شہریوں کے فوری انخلاء کی ہدایات جاری کرتے ہوئے کہا ہے کہ ہنگامی انخلاء کی صورت میں عوام انتظامیہ سے بھرپور تعاون کریں۔انہوں نے کہاکہ شہری کسی بھی ہنگامی صورتحال میں پی ڈی ایم اے کی ہیلپ لائن 1129 پر رابطہ کر سکتے ہیں۔