یونیورسٹی آف سرگودھا کی جانب سے فیکلٹی و سٹاف ممبران کی تقرری اور ترقی کا نوٹیفیکیشن جاری

سرگودھا (اُردو پوائنٹ اخبارتازہ ترین - اے پی پی۔ 30 جولائی2024ء) یونیورسٹی آف سرگودھا نے سنڈیکیٹ کی منظوری کے بعد 120فیکلٹی و سٹاف ممبران کی تقرری اور ترقی کا نوٹیفیکیشن جاری کر دیا جس میں 4پروفیسر، 43ایسوسی ایٹ پروفیسر،50اسسٹنٹ پروفیسر،23 نان ٹیچنگ سٹاف ممبران شامل ہیں۔ نئے بھرتی اورپروموٹ ہونے والے فیکلٹی وسٹاف ممبران کے اعزاز میں رجسٹرار آفس کی جانب سے خصوصی تقریب کا انعقاد کیا گیا جس میں وائس چانسلر پروفیسر ڈاکٹر قیصر عباس بطور مہمانِ خصوصی شریک ہوئے اور نئے بھرتی ہونے والے فیکلٹی و سٹاف ممبران میں آفس آرڈر تقسیم کیے۔

تقریب میں پرو وائس چانسلر پروفیسر ڈاکٹر میاں غلام یاسین، رجسٹرار وقار احمد سمیت فیکلٹی ڈینز اور تعلیمی و انتظامی شعبہ جات کے صدور نے شرکت کی۔

(جاری ہے)

تقریب سے خطاب کرتے ہوئے وائس چانسلر پروفیسر ڈاکٹر قیصر عباس نے کہا کہ معیاری فیکلٹی کے بغیر کوئی بھی تعلیمی ادارہ علمی ترقی نہیں کر سکتا، اسی بات کو مدِ نظر رکھتے ہوئے یونیورسٹی آف سرگودھا میں فیکلٹی ممبران کی تعداد میں بتدریج اضافہ کیا جا رہا ہے تاکہ طلبہ کو معیاری تعلیم کی فراہمی یقینی بنائی جا سکے۔

وائس چانسلر نے بتایا کہ گزشتہ دو سال کے دوران 200سے زائد فیکلٹی ممبران کی تقرری عمل میں لائی گئی ہے جبکہ مزید تعیناتیوں کے لیے آنے والے چند ماہ میں مزید سلیکشن بورڈز کا انعقاد کیا جائے گا۔ نئے تعینات ہونے والے فیکلٹی ممبران کو مبارکباد دیتے ہوئے وائس چانسلر نے اس امید کا اظہار کیا کہ وہ یونیورسٹی آف سرگودھا کو جدید تعلیم و تحقیق کا گڑھ بنانے کیلئے دن رات محنت کریں گے۔

وائس چانسلر نے کہا کہ ہمارے اساتذہ کی قابلیت اور ان کی تعلیمی خدمات کی بدولت عالمی درجہ بندی کے معتبر ادارہ نے یونیورسٹی آف سرگودھا کو پنجاب میں ٹیچنگ کی بہترین جبکہ پاکستان کی دوسری بہترین یونیورسٹی قرار دیا ہے، نئے تعینات ہونے والے فیکلٹی ممبران پر یہ ذمہ داری عائد ہوتی ہے کہ وہ اب یونیورسٹی آف سرگودھا کو عالمی سطح پر ٹیچنگ کی بہترین یونیورسٹی بنانے کیلئے تگ و دو کریں۔

وائس چانسلر نے مزید کہا کہ یہ تقریب صرف تقرری و ترقی کے آرڈرز کی تقسیم تک محدود نہیں بلکہ یہ اس عزم کا اعادہ ہے کہ ہم ایک مضبوط اور مثالی تعلیمی ادارے کی تشکیل کیلئے کام کریں گے۔رجسٹرار وقار احمد نے تقریب سے خطاب کرتے ہوئے بتایا کہ موجودہ وائس چانسلر کی تعیناتی کے بعد سے لیکر اب تک دو سال کے کم عرصہ میں 55سے زائد سٹیچوایٹری باڈیز کے اجلاس منعقد کر کے تعطل کا شکار ہونے والے کام تیزی سے مکمل کیے گئے، قلیل عرصہ میں تقریباً 10 سلیکشن بورڈز منعقد کر کے250خالی نشستوں پر200سے زائد فیکلٹی ممبران کی تعیناتی شامل ہے۔

انہوں نے مزید کہا کہ سب سے بڑا مسئلہ ان فیکلٹی ممبران کا تھا کہ جو عرصہ دراز سے ترقی سے محروم تھے، تسلسل سے سلیکشن بورڈ منعقد کرنے سے ان فیکلٹی ممبران کو پیشہ ورانہ ترقی کے مواقع میسر آئے اور 82فیکلٹی ممبران نے ترقی حاصل کی جبکہ نئے فیکلٹی ممبران کی تقرری سے ہائر ایجوکیشن کمیشن کے معیار کے مطابق طلبہ و اساتذہ کے تناسب میں بہتری آئی ہے۔ وقار احمد نے تسلسل سے سلیکشن بورڈز کے انعقاد میں تعاون پر سلیکشن بورڈز کے ممبران کا شکریہ ادا کیا کہ جن کی بدولت یونیورسٹی آف سرگودھا کو اپنا ہدف حاصل کرنے میں مدد ملی۔