جشن آزادی پر شجرکاری مہم کامیاب بنانا مذہبی فریضہ، ڈاکٹر رمیش کمار وانکوانی کا قومی پرچم کے رنگوں کو اقلیتی بنیادوں میں تقسیم کرنے پر اظہارِ افسوس

بدھ 14 اگست 2024 15:23

اسلام آباد (اُردو پوائنٹ اخبارتازہ ترین - این این آئی۔ 14 اگست2024ء) پاکستان ہندو کونسل کے سرپرست اعلیٰ ڈاکٹر رمیش کمار وانکوانی نے کہا ہے کہ پاکستان کے قومی پرچم میں سبز رنگ تمام پاکستانی شہریوں بشمول اقلیتوں کی نمائندگی کرتا ہے جبکہ جھنڈے میں موجود سفید پٹی امن و سلامتی کی علامت ہے۔ پاکستان کے 77ویں جشن آزادی کی مناسبت سے منعقدہ ایک تقریب سے بطور مہمان خصوصی اپنے خطاب میں اظہارِ افسوس کیا کہ پاکستان میں کچھ عناصر محب وطن اقلیتوں کو قومی دھارے سے باہر کرنے کیلئے پاکستانی جھنڈے میں موجود سفید پٹی کو اقلیتوں سے منسوب کرکے قومی پرچم کو بھی اقلیتی اکثریتی بنیادوں میں تقسیم کرنے کی کوشش کرتے ہیں۔

ڈاکٹر رمیش وانکوانی نے اپنی تقریر میں بانی پاکستان قائداعظم کی گیارہ اگست کی تقریر کا بھی حوالہ دیا جس میں انہوں نے تمام پاکستانی شہریوں کو اپنی مرضی کی عبادت گاہوں میں جانے کی یقین دہانی کرائی تھی۔

(جاری ہے)

اس موقع پر ڈاکٹر رمیش کمار وانکوانی نے تقریب کے شرکاء کو پاکستان ہندو کونسل اور ڈاکٹر پریم کمار سیتل داس میموریل ٹرسٹ کے زیر اہتمام شہر قائد کراچی اور ملک کے مختلف علاقوں میں جاری شجرکاری مہم کے بارے میں آگاہ کیا کہ وہ سندھ کے پسماندہ ترین ضلع تھر پارکر میں پریم نگر کی صورت میں ہرا بھرا درختوں سے بھرپور رول ماڈل خطہ اراضی قائم کرنے کیلئے کوشاں ہیں، پاکستان ہندو کونسل کی اپیل پر رواں برس جشن آزادی کے موقع پر ملک بھر میں ہندو اقلیتی شہری اپنے اپنے علاقوں میں شجرکاری مہم میں حصہ لے رہے ہیں۔