راولپنڈی، حضرت امام حسین علیہ السلام اور شہدائے کربلا کا چہلم عقیدت و احترام سے منایا گیا

منگل 27 اگست 2024 00:50

راولپنڈی (اُردو پوائنٹ اخبارتازہ ترین - اے پی پی۔ 27 اگست2024ء) ملک بھر کی طرح راولپنڈی میں بھی حضرت امام حسین علیہ السلام اور شہدائے کربلا کا چہلم عقیدت و احترام سے منایا گیا۔امام حسین علیہ السلام اور شہدائے کربلا کو خراج عقیدت پیش کرنے کیلئے راولپنڈی میں سوموار کی صبح سے لے کر رات گئے تک مختلف علاقوں میں ماتمی جلوس نکالے گئے۔عزاداروں کے لیے جلوس کے تمام راستوں پر سبیلوں کا بھی انتظام کیا گیا تھا۔

پولیس اور رضاکاروں کے حفاظتی حصار پر مبنی سکیورٹی چیکنگ سے گزرنے کے بعد ہی عزاداروں کو جلوس میں داخلے کی اجازت دی گئی، واک تھرو گیٹس، میٹل ڈیٹیکٹرز اورالیکٹرک بیریئیرز کے ساتھ جلوس کے تمام راستوں سے منسلک گلیوں اور سڑکوں کو خاردار تاریں اور ٹینٹ لگا کر بند کیا گیا تھا۔

(جاری ہے)

جلوس کے روٹ کی سی سی ٹی وی کیمروں کے ذریعے مانیٹرنگ کی گئی جبکہ جلوس کے روٹ میں آنے والی بلند عمارتوں پر سنائپرز تعینات کئے گئے تھے، ڈولفن سکواڈ اور پولیس ریسپانس یونٹ کی ٹیمیں جلوس کے گردونواح میں پٹرولنگ کرتی رہیں۔

راولپنڈی میں شہدائے کربلا کے چہلم کا مرکزی جلوس امام باگارہ کرنل مقبول سے برآمد ہوا، جلوس روایتی راستوں کمیٹی چوک، لیاقت روڈ سے ہوتا ہوا فوارہ چوک پہنچا۔جلوس کے عزاداروں نے فوارہ چوک پر نمازظہرین ادا کی، علمائے کرام نے فلسفۂ حسینیت پر روشنی ڈالی۔جلوس کے شرکاء نے ڈنگی کھوئی چوک پر زنجیر زنی اور سینہ کوبی کی جبکہ جلوس پرانا قلعہ اور جامع مسجد روڈ سے ہوتا ہوا قدیمی امام بارگاہ پہنچ کر اختتام پذیر ہو گیا۔