موٹرویز اور جی ٹی روڈ پر حادثات کی روک تھام اور مسافرو ں کے ریسکیو کیلئے اہم اقدامات کا فیصلہ

روزانہ کی بنیاد پر ڈیٹا طلب، شاہراہوں کو زیادہ سے زیادہ محفوظ ہونا چاہیے، وفاقی وزیرعبدالعلیم خان این ایچ اے کو نئے ٹاسک تفویض، فرائٹ اینڈ لاجسٹک پالیسی پر سختی سے عملدرآمد یقینی بنائیں،وفاقی وزیر

پیر 9 ستمبر 2024 19:35

اسلام آباد (اُردو پوائنٹ اخبارتازہ ترین - این این آئی۔ 09 ستمبر2024ء) وفاقی وزیر مواصلات و نجکاری اور سرمایہ کاری بورڈ عبدالعلیم خان نے موٹرویز جی ٹی روڈ پر حادثات کی روک تھام اور زخمی ہونے والے مسافروں کو ریسکیو کرنے کے لئے اہم اقدامات کی ہدایت کر دی ہے۔انہوں نے وزارت مواصلات سے قومی شاہراہوں پر ہونے والے حادثات کا روزانہ کی بنیاد پر ڈیٹا طلب کر لیا ہے۔

پیر کو یہاں اسلام آباد میں نیشنل ہائی وے اتھارٹی کے اعلیٰ سطحی اجلاس کی صدارت کرتے ہوئے اس تجویز پر غور کیا گیا کہ بالخصوص موٹرویز پر زخمی مسافروں کو 1122 کی ایمرجنسی سروسز کے علاوہ ہیلی کاپٹر کے ذریعے بھی ہسپتالوں میں فوری طور پر منتقل کیا جائے تاکہ کم سے کم وقت میں طبی امدادکی فراہمی سے قیمتی جانوں کو بچایا جا سکے۔

(جاری ہے)

اجلاس میں وفاقی سیکرٹری مواصلات علی شیر محسود اور چیئرمین این ایچ اے شہریار سلطان سمیت دیگر افسران نے وفاقی وزیر عبدالعلیم خان کو محکمانہ امور پر بریفنگ دی جس پر وفاقی وزیر مواصلات عبدالعلیم خان کا کہنا تھا کہ شہریوں کے لیے موٹرویز اور جی ٹی روڈ کو زیادہ سے زیادہ محفوظ ہونا چاہیے جس کے لئے ضروری ہے کہ نیشنل ہائی وے اتھارٹی کوشارٹ اور لانگ ٹرم پالیسیوں پر عمل کرنا ہوگا۔

وفاقی وزیر مواصلات عبدالعلیم خان نے این ایچ اے سے مالی استحکام کے لئے آئندہ 5 برسوں کا ایکشن پلان بھی طلب کر تے ہوئے کہا کہ نیشنل ہائی وے اتھارٹی سرکاری فنڈز کے بے دریغ استعمال کی بجائے صرف قابل عمل منصوبوں پر کام کرے۔انہوں نے این ایچ اے کو نیشنل ٹرانسپورٹ پالیسی کی تیاری کا ٹاسک بھی سونپ دیا، اسی طرح این ایچ اے موٹروے پر ہر ٹرک اور ٹرالے کی ویڈیو سرویلنس یقینی بنا نے کی ہدایت کی جبکہ دیگر شاہرات کی جی ٹی روڈ پر بھی ایکسل لوڈ کا نفاذ عمل میں لایا جائے۔

وفاقی وزیر مواصلات عبدالعلیم خان نے کہا کہ فرائٹ اینڈ لاجسٹک پالیسی پر سختی سے عملدرآمد کیا جائے اور کہیں کوئی سفارش یا کوتاہی قابل قبول نہیں ہوگی،مزید برآں سفارش یا کوتاہی کی صورت میں فوری کارروائی عمل میں لائی جائے۔ وفاقی وزیر مواصلات نے اجلاس میں این ایچ اے کے سینئر افسران سے گفتگو کرتے ہوئے کہا کہ مالی لحاظ سے خود مختار ہونے کے لیے ضروری ہے کہ نیشنل ہائی وے اتھارٹی اپنا مربوط بزنس پلان وضع کرے، انہوں نے این ایچ اے کو ٹال ٹیکس اکٹھا کرنے کا جدید میکنزم اختیار کرنے کی بھی ہدایت کی۔

اجلاس میں وفاقی سیکرٹری مواصلات اور چیئرمین این ایچ اے نے وفاقی وزیر عبدالعلیم خان کو محکمانہ بریفنگ دی جس میں بتایا گیا کہ ملک بھر میں شاہراہوں کی تعمیر و مرمت کا کام جاری ہے جس سے ادارے کی کارکردگی میں واضح بہتری آ رہی ہے۔