بھارت 19سالہ ڈیلیوری بوائے نے شکایت پر دلبرداشتہ ہو کر خودکشی کرلی

پووتھرن کو گروسریز کی ڈیلیوری کا آرڈر ملا ‘گاہک خاتون نے تاخیرپر پووتھرن کی شکایت کی‘خودکشی کے بعد پولیس کی کمپنی سے تحقیقات

میاں محمد ندیم جمعہ 20 ستمبر 2024 17:25

نئی دہلی(اردوپوائنٹ اخبارتازہ ترین-انٹرنیشنل پریس ایجنسی۔20 ستمبر ۔2024 ) بھارت میں ایک 19سالہ ڈیلیوری بوائے نے گاہک کی جانب سے سخت رویہ اپنائے جانے پر دلبرداشتہ ہو کر خودکشی کرلی،بھارتی میڈیا رپورٹس کے مطابق یہ واقعہ چنئی میں پیش آیا جہاں 19سال کا پووتھرن بی کام کا طالبعلم تھا جو پڑھائی کے ساتھ پارٹ ٹائم نوکری بھی کیا کرتا تھا.

(جاری ہے)

پولیس کے مطابق 11ستمبر کو پووتھرن کو گروسریز کی ڈیلیوری کا آرڈر ملاتاہم لڑکے کو گھر ملنے میں مشکلات کا سامنا کرنا پڑا جس کی وجہ سے آرڈر میں تاخیر ہوگئی جب پووتھرن پہنچا تو خاتون نے اسے ڈانٹا اور بحث شروع کر دی بعدازاں شام میں انہوں نے ڈیلیوری پلیٹ فارم پر فون کرکے پووتھرن کی شکایت کی اور کہا آئندہ اسے گروسریز کی ڈیلیوری کرنے نہ بھیجا جائے پولیس کے مطابق کمپنی نے پووتھرن کے خلاف ایکشن لیا لیکن یہ واضح نہیں کہ اسے کیا سزا دی جانی تھی.

واقعہ کے دو دن بعد پووتھرن گاہک کی رہائش گاہ پر واپس آیا اور مبینہ طور پر اس کی کھڑکی پر پتھر مار کر شیشہ توڑ دیا جس کے بعد خاتون نے پولیس میں شکایت کی پولیس نے پووتھرن کا پتہ لگایا اور پوچھ گچھ کے لیے بلایا گیا اور سخت انتباہ جاری کیا ایک طالبعلم کی حیثیت سے اس پر کوئی باقاعدہ ایف آئی آر نہیں کاٹی گئی بعدازاں واقعے کے 5دن بعد پووتھرن کمرے میں مردہ پایا گیا.

اس کی لاش کے پاس خودکشی کا نوٹ بھی تھا جس میں اس نے تحریر کیا کہ گاہک کے ساتھ ہوئے واقعے اور پھر اس کی شکایت لگانے کی وجہ سے وہ اپنی زندگی ختم کر رہا ہے پولیس کا بتانا ہے کہ ہم نے کمپنی کے خلاف کارروائی کا آغاز کردیا ہے اور تحقیقات کی جا رہی ہیں کہ آیا کمپنی کی طرف سے اس پر کسی قسم کا دبا ﺅتو نہیں تھا.