وزیراعلیٰ مریم نوازشریف سے پاکستان نیول وارکالج کے وفد کی ملاقات

بدھ 9 اکتوبر 2024 21:38

لاہور (اُردو پوائنٹ اخبارتازہ ترین - آن لائن۔ 09 اکتوبر2024ء) وزیراعلیٰ پنجاب مریم نواز شریف سے رئیر ایڈمرل اظہر محمود کی سربراہی میں پاکستان نیول وار کالج کے وفد نے ملاقات کی،118رکنی وفد میں پاکستان نیوی کے علاوہ 16 دوست ممالک کے افسران بھی شامل تھے۔ وزیراعلیٰ پنجاب مریم نواز شریف نے اس موقع پر گفتگوکرتے ہوئے کہاکہ پنجاب میں آرٹیفیشل انٹیلی جنس یونیورسٹی کا آغاز جلد کررہے ہیں،لاہور میں محمد نوازشریف آئی ٹی سٹی کا پراجیکٹ چند ماہ میں شروع ہوجائے گا،اپنے تمام مہمانوں خاص طور پر غیر ملکی افسران کا لاہور میں خیر مقدم کرتے ہیں۔

انہوں نے کہا ہم مثبت تبدیلیاں لانا چاہتے ہیں خوشحال پنجاب ہماری منزل ہے ۔ عوام کو خوش دیکھنا میرے لئے ایوارڈ کے مترادف ہے ۔

(جاری ہے)

انہوں نے کہا خلاوص نیت کے ساتھ کی جانے والی ہر کوشش کامیابی سے ہمکنار ہوتی ہے ۔ مریم نوازشریف نے اس موقع پر سعودی عرب، یمن اور نائیجریا کے نیول افسران کے سوالا ت کے جواب بھی دیئے اورعالمی سطح پربدلتی صورتحال کے تناظر میں دفاعی میدان میں جدید ٹیکنالوجی کی ضرورت پر زوردیا۔

وزیراعلیٰ پنجاب نے پاکستان نیوی کے افسروں اور جوانوں کی پیشہ وارنہ خدمات کو خراج تحسین پیش کرتے ہوئے پاکستان نیوی وار کالج میں ملکی وغیر ملکی افسران کو دی جانے والی عسکری پیشہ وارانہ تربیت کو بھی سراہا،وزیراعلیٰ نے میری ٹائم کی ترقی اور بلیو اکانومی کے فروغ کے لئے پاک بحریہ کے اقدامات کی تعریف کی۔ سینیئر صوبائی وزیر مریم اورنگزیب، صوبائی وزیر اطلاعات وثقافت عظمیٰ زاہد بخاری،چیف سیکرٹری،ڈپٹی کمانڈنٹ کموڈور احسان احمد خان، پرنسپل سیکرٹری اور دیگر حکام بھی اس موقع پر موجود تھے۔