پاکستان 2022ء سے اب تک ہوم گراؤنڈ پر جیت سے محروم واحد ٹیم

قومی ٹیم نے 2022ء سے اب تک پاکستان میں مجموعی طور پر 10 میچز کھیلے جس میں سے 6 میں شکست اور 4 ڈرا ہوئے

ذیشان مہتاب جمعہ 11 اکتوبر 2024 16:09

پاکستان 2022ء سے اب تک ہوم گراؤنڈ پر جیت سے محروم واحد ٹیم

لاہور (اردو پوائنٹ تازہ ترین اخبار ۔ 11 اکتوبر 2024ء ) ملتان ٹیسٹ میں انگلینڈ نے پاکستان کو ایک اننگ اور 47 رنز سے شکست دی جس کے بعد قومی ٹیم نے ہوم گراؤنڈ پر اپنی ایک اور شکست میں اضافہ کیا۔ قومی ٹیم 2022ء کے بعد سے اب تک ایک میچ بھی ہوم گراؤنڈ پر نہیں جیت سکی ہے جس وجہ سے اس لسٹ میں پاکستان کی پوزیشن سب سے خراب ہے۔ 2022ء سے اب تک ہوم گراؤنڈ پر جنوبی افریقا نے 8 میچز کھیلے جس میں سے وہ 7 میں کامیاب رہا اور ایک میں پروٹیز کو شکست ہوئی۔

اس طرح جنوبی افریقا کا ان 2 سالوں میں ہوم گراؤنڈ پر ٹیسٹ جیتنے کا تناسب سب سے زیادہ 87.5 فیصد ہے۔

(جاری ہے)

اس فہرست میں بھارت دوسرے، آسٹریلیا تیسرے، انگلینڈ چوتھے، سری لنکا پانچویں، نیوزی لینڈ چھٹے، ویسٹ انڈیز ساتویں، بنگلادیش آٹھویں اور پاکستان سب سے بدترین یعنی 9ویں پوزیشن پر ہے۔ پاکستان 2022ء سے اب تک ہوم گراؤنڈ پر ایک بھی میچ نہیں جیت سکا، قومی ٹیم نے ان 2 برس میں مجموعی طور پر 10 میچز کھیلے جس میں سے 6 میں شکست اور 4 ڈرا ہوگئے۔ پاکستان ہوم گراؤنڈ پر 3 میچز آسٹریلیا، 2 بنگلادیش اور ایک آج کا میچ انگلینڈ سے ہارا۔ اس کے علاوہ ڈرا میچز کو دیکھا جائے تو 2022ء میں 2 میچز آسٹریلیا سے ڈرا ہوئے جب کہ 2023ء کے آغاز پر نیوزی لینڈ سے بھی دونوں ٹیسٹ میچز ڈرا ہوئے۔