لاہور، پنجاب کالج میں طالبہ سے مبینہ زیادتی کا معاملہ،کالج سیل ، رجسٹریشن منسوخ

صوبائی وزیر تعلیم کی مشتعل طلباء سے ملاقات میں انصاف کی یقین دہانی، پولیس کی بھاری نفری کالج کے باہر اور اندر موجود ہے جبکہ قیدیوں کی وین بھی کالج کے باہر پہنچ گئی

فیصل علوی پیر 14 اکتوبر 2024 15:24

لاہور، پنجاب کالج میں طالبہ سے مبینہ زیادتی کا معاملہ،کالج سیل ، رجسٹریشن ..

لاہور(اردوپوائنٹ اخبار تازہ ترین۔ 14اکتوبر 2024) لاہور کے علاقے گلبرگ میں واقع پنجاب کالج میں طالبہ سے مبینہ زیادتی کی اطلاع کے بعد محکمہ تعلیم پنجاب نے پنجاب کالج کے گلبرگ کیمپس کو سیل کرتے ہوئے کالج کی رجسٹریشن معطل کردی،صوبائی وزیر تعلیم کی مشتعل طلباءسے ملاقات میں انصاف کی یقین دہانی،پولیس کی بھاری نفری کالج کے باہر اور اندر موجود ہے جبکہ قیدیوں کی وین بھی کالج کے باہر پہنچ گئی۔

تفصیلات کے مطابق صوبائی وزیر تعلیم رانا سکندر حیات نے پنجاب کالج کی طالبہ سے مبینہ زیادتی کے معاملے کا نوٹس لے لیا اور پنجاب کالج پہنچ گئے جہاں انہوں نے مشتعل طلبہ سے ملاقات کی۔ طلبا ءصوبائی وزیر رانا سکندر حیات کے ساتھ کالج کیمپس میں داخل ہوئے اور کلاسز میں توڑ پھوڑ شروع کردی۔

(جاری ہے)

بعدازاں رانا سکندر حیات نے طلبہ کو انصاف کو یقین دلاتے ہوئے کہا کہ متاثرہ طالبہ کو ہر صورت انصاف دیا جائیگا اور ملزمان کو کیفرکردار تک پہنچایا جائیگا۔

صوبائی وزیر تعلیم نے طلبا کو تمام مطالبات پورے کرنے کی یقین دہانی کروائی۔ پنجاب کالج کے مسلم ٹاﺅن اور ائیرلائن سوسائٹی سمیت دیگر کیمپسز میں بھی طلبا و طالبات نے مبینہ زیادتی کے واقعے کے خلاف احتجاج کیا۔ احتجاج کے باعث گلبرگ، فیروزپور روڈ، کینال روڈ سمیت مختلف شاہراہوں پر ٹریفک جام رہی۔یہ بھی بتایاگیا ہے کہ آج صبح لاہور کے نجی کالج میں طالبہ سے مبینہ زیادتی کی خبر کے بعد مشتعل طلباءنے گلبرگ کیمپس پر دھاوا بول دیا اور کالج کا گیٹ توڑادیا جبکہ سامان کو آگ لگا دی۔

مشتعل طلباءکے تصادم کے نتیجے میں 27 افراد زخمی ہوئے۔انتظامیہ نے کالج کی طالبات کو باہر جانے سے روکتے ہوئے کلاسز کو بند کردیا۔ پولیس نے طلبا کو منتشر کرنے کی کوشش کی تو تصادم میں 5 پولیس اہلکاروں سمیت 27 افراد زخمی ہوگئے۔واضح رہے کہ اس معاملے پر دو پہلو سامنے آئے ہیں۔ ایک طرف کالج کی طالبات نے کلاسز کا بائیکاٹ کیا اور واقعہ پر کنال روڈ پراحتجاج کرکے شاہراہ بند کردی۔

دوسری جانب پولیس نے کہا ہے کہ پنجاب کالج میں طالبہ سے مبینہ زیادتی واقعے کی تاحال تصدیق نہیں ہوسکی اورمبینہ متاثرہ بچی اور اس کا خاندان سامنے نہیں آئے۔گزشتہ روز پنجاب کالج کی طالبہ کے ساتھ مبینہ طور پر سیکورٹی گارڈ کی جانب سے زیادتی کرنے کی اطلاعات سامنے آئیں تھیں جس کے بعد پولیس نے مشتبہ سیکورٹی گارڈ میں حراست میں لے گیا تھا ۔اس معاملے پر ڈی آئی جی فیصل کامران کا کہنا تھاکہ متاثرہ اور اس کے اہلخانہ کی جانب سے تاحال کوئی رابطہ نہیں کیا گیا جبکہ واقعے سے متعلق متعلقہ پولیس اسٹیشن، 15 پولیس ہیلپ لائن اور کالج انتظامیہ کو کسی قسم کی اطلاع نہیں ملی تھی۔ترجمان لاہور پولیس کا کہنا تھاکہ لاہور پولیس کالج انتظامیہ اور طلبا سے مسلسل رابطے میں ہیں۔