قاضی فائز عیسیٰ کے کرتوت قبر تک ان کا پیچھا کریں گے، تاریخ اُن کے محاسبے کو تیار ہے

9 سالہ بچی کو گھسیٹنا اور 11 ماہ کے بچے کو بستر سے گرانا جائز ہے؟ لیکن فائز عیسٰی کے سامنے اونچی آواز میں بولنا ناجائز ہے؟ سابق چیف جسٹس کے ساتھ پیش آئے واقعے پر پی ٹی آئی کا ردعمل

محمد علی بدھ 30 اکتوبر 2024 22:00

قاضی فائز عیسیٰ کے کرتوت قبر تک ان کا پیچھا کریں گے، تاریخ اُن کے محاسبے ..

لاہور (اُردو پوائنٹ اخبارتازہ ترین۔ 30 اکتوبر2024ء) پی ٹی آئی کا کہنا ہے کہ قاضی فائز عیسیٰ کے کرتوت قبر تک ان کا پیچھا کریں گے۔ تفصیلات کے مطابق سابق چیف جسٹس قاضی فائز عیسٰی کیخلاف لندن میں ہوئے احتجاج کے واقعے پر تحریک انصاف کی جانب سے ردعمل دیا گیا ہے۔ تحریک اںصاف نے سوال اٹھایا ہے کہ 9 سالہ بچی کو گھسیٹنا اور 11 ماہ کے بچے کو بستر سے گرانا جائز ہے؟ لیکن فائز عیسٰی کے سامنے اونچی آواز میں بولنا ناجائز ہے؟۔

‏قاضی فائز عیسیٰ کے کرتوت تو قبر تک ان کا پیچھا کریں گے جبکہ تاریخ اُن کے محاسبے کو تیار ہے۔ جبکہ لندن میں سابق چیف جسٹس قاضی فائز عیسٰی کیخلاف احتجاج کرنے والے پاکستانیوں کی پاسپورٹ اور شناختی کارڈ بلاک کرنے کے وزیر داخلہ کے بیان پر بھی تحریک انصاف کی جانب سے شدید ردعمل دیا گیا ہے۔

(جاری ہے)

پاکستان تحریک انصاف نے ‏وفاقی وزیرداخلہ کے اوورسیز پاکستانیوں کے حوالے سےمضحکہ خیز قرار دیتے ہوئے کہا کہ ‏محسن نقوی کا بیان نہایت بیوقوفانہ حد تک مضحکہ خیز اور مینڈیٹ چور بندوبست کی ذہنیت کا عکاس ہے۔

پی ٹی آئی کے مرکزی ترجمان شیخ وقاص اکرم نے اپنے بیان میں کہا کہ یہ ‏دوسرے روز دنیا کو بتاتے ہیں کہ ہم صرف ان پڑھ ہی نہیں پرلے درجے کے احمق اور جاہل بھی ہیں، ‏خود ساختہ وائسرائے صاحب قاضی فائز عیسیٰ کے خلاف احتجاج کرنے والوں کی شہریت کی منسوخی سے پہلے کسی پڑھے لکھے وکیل سے قانون سے متعلق سیکھ لیں۔ انہوں نے کہا کہ ‏ظاہر ہے کہ پاکستان ان کے آبا و اجداد کی راجدھانی یا خاندانی جاگیر تو ہے نہیں کہ یہاں درباری اپنی زبانوں کے لمبائی کے مطابق بیان دیں، ‏شناختی کارڈ، پاسپورٹس یا شہریت کی منسوخی و اجرا کے فیصلے محسن نقوی کی صوابدی نہیں بلکہ یہ آئین و قانون کے مرہونِ منت ہیں۔

شیخ وقاص اکرم نے کہا کہ ‏آئین و قانون کی گردن پر پیر رکھ کر مرضی کے فرمان جاری کرنے کے بیہودہ سلسلے نے دنیا میں پاکستان کا جمہوری اور آئینی تشخص بری طرح مجروح کیا ہے، ‏قاضی فائز عیسیٰ کے کرتوت تو قبر تک ان کا پیچھا کریں گے جبکہ تاریخ اُن کے محاسبے کو تیار ہے۔ ترجمان تحریک انصاف نے کہا کہ ‏محسن نقوی ”غنڈہ راج“ کے خیالی سیٹ سے اتریں اور دنیا کو اپنےجاہلانہ جلال دکھانے کی بجائے تھوڑی سی تمیز اور قانون کے احترام کی اداکاری کی ہلکی سی کوشش ہی کرلیں، ‏کسی سے کوئی غلطی یا جرم سرزد ہوا ہے تو خود قاضی کی پتلون پہن کر اچھلنے کی بجائے عدالت کو فیصلے کا موقع دیں۔