چمن میں ٹیکسی اسٹینڈ کے قریب دھماکہ، 5 افراد جاں بحق

دھماکا خیز مواد مسافروں کے سامان میں رکھا ہوا تھا، علاقے کو گھیرے میں لے لیا گیا

محمد علی جمعرات 18 ستمبر 2025 22:56

چمن (اُردو پوائنٹ اخبارتازہ ترین۔ 18 ستمبر2025ء) چمن میں ٹیکسی اسٹینڈ کے قریب دھماکہ، 5 افراد جاں بحق، دھماکا خیز مواد مسافروں کے سامان میں رکھا ہوا تھا، علاقے کو گھیرے میں لے لیا گیا۔ تفصیلات کے مطابق بلوچستان کے علاقے چمن میں پاک افغان سرحد کے قریب ٹیکسی اسٹینڈ میں دھماکے سے متعدد افراد جان کی بازی ہار گئے۔ بلوچستان حکومت کے مطابق چمن میں بارڈر ٹیکسی اسٹینڈ پر زور دار دھماکا ہوا جس میں 8افراد زخمی ہوئے جن میں سے پانچ جاں بحق ہوگئے۔

(جاری ہے)

ڈپٹی کمشنر چمن نے بتایا کہ دھماکے میں تین افراد زخمی ہیں، زخمیوں اور مرنے والوں کوہسپتال منتقل کردیا گیاہے ،جبکہ چمن ہسپتال میں ایمرجنسی نافذ کردی گئی ہے۔ڈپٹی کمشنر حبیب بنگلزئی نے بتایا کہ ابتدائی اطلاعات کے مطابق دھماکا خیز مواد مسافروں کے سامان میں رکھا ہوا تھا،جبکہ اس کی نوعیت کا تعین کیا جارہا ہے۔دھماکے کے بعد پولیس اور سیکیورٹی فورسز نے جائے وقوعہ پر پہنچ کر حادثے کی جگہ کو گھیرے میں لے کر شواہد اکھٹے کیے۔سیکیورٹی فورسز نے علاقے میں سرچ آپریشن شروع کر دیا اور بارڈر کے آس پاس ناکہ بندی کر کے چیکنگ سخت کر دی ہے۔ادھر بلوچستان حکومت نے واقعے کی شدید مذمت کرتے ہوئے وفاقی حکام سے رابطہ کر کے تحقیقات کے لیے اضافی وسائل فراہم کرنے کی درخواست کی ہے۔