Live Updates

عمران خان کی اہلیہ لاہور پہنچ گئیں

بشریٰ بی بی بدھ کی شب کو راولپنڈی سے لاہور پہنچیں، زمان پارک میں قیام کریں گی

محمد علی جمعرات 31 اکتوبر 2024 00:16

لاہور (اُردو پوائنٹ اخبارتازہ ترین۔ 30 اکتوبر2024ء) عمران خان کی اہلیہ لاہور پہنچ گئیں، بشریٰ بی بی بدھ کی شب کو راولپنڈی سے لاہور پہنچیں، زمان پارک میں قیام کریں گی۔ تفصیلات کے مطابق حکومتی رہنماوں کی جانب سے بانی تحریک انصاف کی اہلیہ بشریٰ بی بی کے رہائی کے بعد پشاور جانے پر سوالات اٹھا کر مبینہ ڈیل کی قیاس آرائیاں کی جا رہی تھیں۔ تاہم بشریٰ بی بی پشاور میں مختصر قیام کے بعد لاہور پہنچ گئی ہیں۔

بدھ کے روز بشریٰ بی بی کی ایک ماہ بعد جیل میں بانی پی ٹی آئی سے ملاقات ہوئی۔ بدھ کو اڈیالہ جیل میں 190 ملین پاؤنڈ کیس کی سماعت کے بعد بشریٰ بی بی راولپنڈی سے روانہ ہوئیں۔ خیبر پختونخوا کے وزیر اطلاعات بیرسٹر محمد علی سیف نے کہا تھا کہ بشریٰ بی بی کی پشاور واپسی کا فیصلہ وہ خود کریں گی۔

(جاری ہے)

فی الحال ان کے لاہور جانے اور وہاں چیک اپ کے لئے رکنے کا امکان ہے۔

بشریٰ بی بی لاہور پہنچ کر اب زمان پارک میں قیام کریں گی، زمان پارک کے باہر پولیس کی نفری تعینات ہے، کارکنان بھی زمان پارک پہنچنا شروع ہوگئے۔ ذرائع کا مزید کہنا ہے بشریٰ بی بی چیک اپ کیلئے شوکت خانم ہسپتال جائیں گی۔ ذرائع کے مطابق بشریٰ بی بی کل اپنے ڈینٹسٹ کے پاس جائیں گی، دانت کےعلاج کے بعد بشریٰ بی بی واپس پشاور جا سکتی ہیں۔

دوسری جانب پاکستان تحریک انصاف کی خاتون رہنما زرتاج گل وزیر نے بشریٰ بی بی کی پشاور آمد پر اعتراض کرنے والوں کو جواب دے دیا۔ بدھ کے روز راولپنڈی کی انسداد دہشت گردی عدالت (اے ٹی سی) کے باہر میڈیا سے گفتگو میں زرتاج گل وزیر نے کہا کہ پاکستان بشریٰ بی بی کا ملک ہے۔انہوں نے کہا کہ بشریٰ بی بی پشاور میں رہیں، بنی گالہ میں یا پھر زمان پارک میں یہ اٴْن کی مرضی ہے۔پی ٹی آئی رہنما نے کہا کہ بشریٰ بی بی، ن لیگی قائد نواز شریف کی طرح لندن تو نہیں بھاگیں گی، وہ پاکستان میں ہی رہیں گی۔