پاکستانی ترقی میں دوست ممالک کا اہم کردار ہے، ریاض حسین پیرزادہ

پاکستان کے عوام بردار ملک آذربائیجان کیساتھ دوستی کو قدر کی نگاہ سے دیکھتے ہیں،وفاقی وزیرہائوسنگ کاتقریب سے خطاب

بدھ 6 نومبر 2024 22:45

اسلام آباد(اُردو پوائنٹ اخبارتازہ ترین - این این آئی۔ 06 نومبر2024ء) وفاقی وزیر برائے ہاؤسنگ و تعمیرات ریاض حسین پیرزادہ نے کہا ہے کہ پاکستان کی تعمیر و ترقی میں موجودہ حکومت کی پالسیوں اور دوست ممالک کا اہم ترین کردار ہے۔بدھ کووفاقی وزیر ریاض حسین پیرزادہ نے اسلام آباد میں ایک نجی ہوٹل میں آذربائیجان کے یوم دفاع کی مناسبت سے منعقدہ تقریب سے خطاب کرتے ہوئے کہا کہ قوموں کی تشکیل میں بے پناہ قربانیاں دی جاتی ہیں۔

انہوں نے کہاکہ پاکستان اپنے دوست ممالک کے ساتھ شانہ بشانہ کھڑا رہے گا۔وفاقی وزیر نے کہا کہ خطے میں بدلتے ہوئے حالات پر گہری نظر ہے، پاکستان کی حکومت نے ہر مشکل وقت میں دوست ملک آذربائیجان کا ساتھ دیا ہے۔انہوںنے کہاکہ پاکستان کے عوام بردار ملک آذربائیجان کے ساتھ دوستی کو قدر کی نگاہ سے دیکھتے ہیں۔

(جاری ہے)

تقریب میں پاکستان میں متعین آذربائیجان کے سفیر خضر فرہادوف نے کہاکہ ہمیں پاکستان سے دوستی پر فخر پاکستان اور ہمارے ملک کے مذہبی ثقافتی رشتے ایک جیسے ہیں۔

انہوںنے کہاکہ پاکستان ایک تاریخی اہمیت کا حامل ملک ہے اور دفاعی اعتبار سے خطے میں پاکستان کی پالیسیاں بے حد مضبوط ہیں۔اس موقع پر سابق وفاقی وزیر مشاہد حسین سید، وفاقی وزیر روبینہ خورشید عالم، گورنر خیبرپختونخوا فیصل کریم کنڈی کے علاوہ اعلیٰ سول اور ملٹری کے افسران بھی موجود تھے۔