پی آئی اے کی یورپ کیلئے پروازوں پر عائد پابندی کا اٹھنا یاد گار موقع ہے

پابندی اٹھنے سے پی آئی اے کی نجکاری کے عمل میں آسانی ہوگی، اب یورپ کیلئے پی آئی اے کا آپریشن جلد بحال ہوجائے گا، امید ہے کہ جلد برطانیہ اور دیگر ممالک کیلئے بھی پابندی ہٹ جائے گی۔وزیردفاع خواجہ آصف

ثنااللہ ناگرہ جمعہ 29 نومبر 2024 19:49

پی آئی اے کی یورپ کیلئے پروازوں پر عائد پابندی کا اٹھنا یاد گار موقع ..

اسلام آباد ( اردوپوائنٹ اخبار تازہ ترین۔ آئی پی اے۔ 29 نومبر 2024ء ) وزیردفاع خواجہ آصف نے کہا ہے کہ پی آئی اے کی یورپ کیلئے پروازوں پر عائد پابندی کا اٹھنا یاد گار موقع ہے،پابندی اٹھنے سے پی آئی اے کی نجکاری کے عمل میں آسانی ہوگی، اب یورپ کیلئے پی آئی اے کا آپریشن جلد بحال ہوجائے گا۔ انہوں نے اپنے ردعمل میں کہا کہ یورپی کمیشن اور یورپی ایوی ایشن سیفٹی ایجنسی نے پی آئی اے کی پروازوں پر پابندی اٹھالی ہے۔

پی آئی اے پر یورپ کی پروازوں کیلئے عائد پابندی کا اٹھنا یاد گار موقع ہے، پی آئی اے اور ایوی ایشن انڈسٹری تباہی کے دہانے پر آگئی تھی۔ اب یورپ کیلئے پی آئی اے کا آپریشن جلد بحال ہوجائے گا، یہ کامیابی بین الاقوامی شہری ہوابازی تنظیم کے معیارات یقینی بنانے اور وزارت ہوابازی کی مکمل توجہ سے ممکن ہوئی۔

(جاری ہے)

امید ہے کہ جلد برطانیہ اور دیگر ممالک کیلئے بھی پابندی ہٹ جائے گی۔

پی آئی اے کی دیگر پروازوں سے ریٹنگ بہتر ہوئی ہے۔ پابندی اٹھنے سے پی آئی اے کی نجکاری کے عمل میں آسانی ہوگی۔پی آئی اے کی یورپ کیلئے پروازوں پر عائد پابندی ختم کردی گئی ہے۔ دوسری جانب ترجمان پی ائی اے نے بیان میں کہا کہ یورپی ائیر سیفٹی ایجنسی کی جانب سے پاکستانی ائیرلائنزسے پابندی اٹھانے کا فیصلہ ہوگیا اور یہ پاکستان کی ہوابازی کی صنعت کے لیے اہم ترین خبر ہے۔

انہوں نے کہا کہ ایاسا نے اپنے مکتوب میں وزرات ہوابازی اور پی آئی اے انتظامیہ کو باضابطہ آگاہ کردیا ہے، ان کی جانب سے پی آئی اے کی ٹیم اور انتظامیہ کو ان کے سخت ترین اسٹینڈرڈز پر پورے اترنے پر مبارک باد دی ہے۔ ترجمان کا کہنا تھا کہ پی آئی اے انتظامیہ ایاسا اور ان کے قوانین اورضابطوں پر مکمل عمل پیرا رہے گا اور پی آئی اے انتظامیہ نے گزشتہ 4 سال کی انتھک محنت کے بعد یہ اہم سنگ میل عبور کر لیا ہے۔ ان کا کہنا تھا کہ سی ای او پی آئی اے کی جانب سے اس تاریخی موقع پروزرات ہوابازی، سول ایوی ایشن اتھارٹی، پی آئی اے ٹیم اور پوری ہوابازی کی صنعت کو ان کے بھرپور تعاون پر مبارک باد پیش کی۔