مریم نواز کا وزیرآباد کیلئے الیکٹرک بس پراجیکٹ کا آغاز

مریم نواز کا گکھڑ منڈی بس سٹاپ سے ای بس پر سفر، الیکٹرک بس کے روٹ پر عوام کا پرجوش خیر مقدم

بدھ 17 ستمبر 2025 20:11

مریم نواز کا وزیرآباد کیلئے الیکٹرک بس پراجیکٹ کا آغاز

لاہور(اُردو پوائنٹ اخبارتازہ ترین - این این آئی۔ 17 ستمبر2025ء) وزیراعلیٰ پنجاب مریم نواز شریف نے وزیرآباد کے لئے الیکٹرک بس پراجیکٹ کا آغاز کر دیا ہے۔ وزیر اعلیٰ مریم نواز شریف گکھڑ منڈی بس سٹاپ سے ای بس پر سوار ہوئیں ۔ وزیر اعلیٰ مریم نواز شریف کا خیر مقدم کرنے کے لئے الیکٹرک بس کے روٹ پر عوام کا بہت بڑا ہجوم امڈ آیا۔ الیکٹرک بس کے تمام راستے میں عوام پھولوں کی پتیاں نچھاور کرتے رہے۔

عوام وزیراعلیٰ مریم نواز شریف کی تصاویر لے کر راستے میں کھڑے تھے۔ وزیر اعلیٰ مریم نواز شریف نے الیکٹرک بس کا باقاعدہ افتتاح کیا ۔ وزیراعلیٰ مریم نواز شریف کو وزیرآباد الیکٹرک بس پراجیکٹ پر تفصیلی بریفنگ دی گئی۔ بریفنگ میں وزیراعلیٰ مریم نواز شریف کو بتایا گیا کہ وزیرآباد میں 15ماحول دوست الیکٹرک بسیں شہر کے مختلف مضافاتی روٹس پر چلائی جائیں گی۔

(جاری ہے)

الیکٹرک بس میں مسافروں کے لئے وائی فائی اور ہر سیٹ پرموبائل چارجنگ پوٹ بھی میسر ہے۔ ماحول دوست الیکٹرک بسیں مکمل طور پر ایئر کنڈیشنز اور آرام دہ ہیں ۔ بریفنگ میں مزید بتایا گیا کہ الیکٹر ک بس میں خواتین کے تحفظ اور سہولت کو مد نظر رکھتے ہوئے الگ کمپارٹمنٹ مختص کیا گیا ہے۔ خواتین کو ہراساں کرنے واقعات کے سدباب کے لئے سی سی ٹی وی کیمرے بھی الیکٹرک بس میں نصب ہیں۔ الیکٹرک بسیں وزیرآباد تا علی پور چٹھہ اور وزیرآباد تا شیخوپورہ موڑ کے روٹس پر چلائی جائیں گی۔ وزیرآباد میں الیکٹرک بسوں کے لئے تین خصوصی چارجنگ سٹیشن بھی قائم کیے گئے ہیں۔