کراچی: جعلی ڈگری پر امریکا جانے والی خاتون کو 6 سال قید

جعلی ڈگری اور تعلیمی اسناد معاشرے، ڈگری ہولڈرز اور تعلیمی اداروں کے لیے خطرہ ہیں،عدالت

جمعہ 6 دسمبر 2024 17:10

کراچی (اُردو پوائنٹ اخبارتازہ ترین - این این آئی۔ 06 دسمبر2024ء)جوڈیشل مجسٹریٹ جنوبی کی عدالت نے جعلی ڈگری کی بنیاد پر امریکا جانے والی پریانکا دیوی سمیت 4 ملزمان کے خلاف کیس میں تحریری فیصلہ جاری کرتے ہوئے ملزمہ کو مجموعی طور پر 6 سال کی سزا سنا دی۔عدالت نے ملزمہ پر 45 ہزار روپے جرمانہ بھی عائد کیا ہے، اس کے علاوہ عدالت نے 3 شریک ملزمان مریم، امان اور راشد کو 2، 2 سال قید اور ہر ایک پر 20 ہزار روپے جرمانہ ادا کرنے کی سزا سنائی۔

(جاری ہے)

عدالت نے چاروں ملزمان کی ضمانتیں منسوخ کرتے ہوئے انہیں جیل بھیجنے کا حکم جاری کر دیا۔عدالت کی آبزرویشن میں کہا گیا کہ جعلی ڈگری اور تعلیمی اسناد معاشرے، ڈگری ہولڈرز اور تعلیمی اداروں کے لیے خطرہ ہیں۔ایف آئی اے کے مطابق ملزمہ پریانکا دیوی کے خلاف امریکی قونصلیٹ کی شکایت پر انکوائری شروع کی گئی تھی۔ملزمہ نے پڑھائی کی غرض سے امریکا جانے کے لیے کراچی یونیورسٹی کی جعلی ڈگری جمع کرائی تھی۔ایف آئی اے کے مطابق ایجوکیشنل کنسلٹنٹ ملزمہ مریم عادل نے پریانکا دیوی کو جعلی ڈگری لینے پر اکسایا تھا اور ملزم امان نے پریانکا دیوی کو جعلی ڈگری دلوائی تھی۔