پاکستان ایڈورٹائزنگ ایسوسی ایشن کی ٹی اے ایم سروسز کی معطلی پر پیمرا سے نظرثانی کی اپیل

عمر جمشید جمعہ 6 دسمبر 2024 17:58

کراچی (اُردو پوائنٹ اخبارتازہ ترین۔ 06 دسمبر2024ء) پاکستان ایڈورٹائزنگ ایسوسی ایشن (پی اے اے) نے پاکستان الیکٹرانک میڈیا ریگولیٹری اتھارٹی (پیمرا) سے درخواست کی ہے کہ وہ میڈیالوجک کی جانب سے فراہم کردہ ٹیلی ویژن آڈینس میژرمنٹ (ٹی اے ایم) سروسز کی 30 دن کے لیے معطلی کے فیصلے پر نظرثانی کرے۔ یہ درخواست پی اے اے کے چیئرمین کی جانب سے چیئرمین پیمرا کو تحریری خط کے ذریعے کی گئی۔

خط میں پی اے اے نے اس معطلی کے پاکستان کی اشتہاری اور میڈیا انڈسٹری پر ممکنہ اثرات پر تشویش کا اظہار کیا۔ ایسوسی ایشن نے اس بات پر زور دیا کہ ٹی اے ایم ڈیٹا ایڈورٹائزرز اور براڈکاسٹرز کے لیے ایک نہایت اہم ذریعہ ہے، اور ماہانہ بنیادوں پر اربوں روپے اس ڈیٹا کی بنیاد پر مختص کیے جاتے ہیں۔

(جاری ہے)

اس ڈیٹا کی معطلی سے نہ صرف انڈسٹری کے معمولات متاثر ہوں گے بلکہ پہلے سے موجود معاشی مشکلات کے دوران میڈیا انڈسٹری کی پائیداری کو بھی خطرہ لاحق ہو سکتا ہے۔

پی اے اے کے چیئرمین ،احمد کپاڈیا نے اپنے خط میں کہا: "ہم پیمرا کے خدشات کو تسلیم کرتے ہیں، لیکن ہم احتراماً درخواست کرتے ہیں کہ میڈیالوجک کو اس معطلی کی مدت کے دور ٹی اے ایم ڈیٹا فراہم کرنے کی اجازت دی جائے۔ یہ اقدام انڈسٹری کو درکار استحکام فراہم کرے گا، جب تک کہ پیمرا اپنے خدشات کا جائزہ مکمل نہیں کر لیتا۔

پی اے اے نے واضح کیا کہ یہ اپیل پیمرا کے خدشات کو مسترد کرنے کے لیے نہیں بلکہ اس بات کو یقینی بنانے کے لیے ہے کہ اس جائزے کے عمل کے دوران انڈسٹری کے اسٹیک ہولڈرز غیر متناسب طور پر متاثر نہ ہوں۔

ایسوسی ایشن نے امید ظاہر کی کہ پیمرا اس درخواست پر غور کرے گا اور اسے میڈیا اور اشتہاری شعبوں کی ترقی، اعتماد اور استحکام کے لیے اہم سمجھتے ہوئے مناسب فیصلہ کرے گا۔