بین الاقوامی اسلامی یونیورسٹی اور کاروان علم فائونڈیشن کے مابین ایم او یو پر دستخط ،طلباء کو سکالرشپ کی فراہمی اور باہمی تعاون پر اتفاق

اسلام آباد (اُردو پوائنٹ اخبارتازہ ترین - اے پی پی۔ 12 دسمبر2024ء) بین الاقوامی اسلامی یونیورسٹی اسلام آباد اور کاروان علم فائونڈیشن کے درمیان جمعرات کو ایک مفاہمت کی یادداشت پر دستخط کیے گئے جس کا مقصد یونیورسٹی کے قابل اور مستحق طلباء کو وظائف کی فراہمی کے ساتھ ساتھ ان کے لیے پیشہ ورانہ ترقی کے مواقع پیدا کرنا ہے۔ایم او یو پر دستخط کی تقریب یونیورسٹی کے نئے کیمپس میں منعقد ہوئی جہاں صدر یونیورسٹی پروفیسر ڈاکٹر احمد شجاع سید اور کاروان علم فائونڈیشن کے ایگزیکٹو ڈائریکٹر خالد ارشاد صوفی نے دستاویز پر دستخط کیے۔

تفصیلات کے مطابق ابتدائی طورپرغیر معمولی تعلیمی کارکردگی کا مظاہرہ کرنے والے پانچ ضرورت مند طلباء کی اس معاہدہ کے تحت مالی معاونت کی جائے گی۔

(جاری ہے)

مزید برآں مفاہمت نامے میں معذور طلباء کے لیے مالی و لاجسٹک امداد، ہاسٹل اور دیگر متعلقہ ضروریات کو پورا کرنے کے انتظامات شامل ہیں۔ فریقین نے باہمی تعاون کے ذریعے کیریئر کونسلنگ سیمینار منعقد کرنے پر بھی اتفاق کیا۔

تقریب کے دوران پروفیسر ڈاکٹر احمد شجاع سید نے جامعہ کمیونٹی کی جانب سے اظہار تشکر کیا۔ انہوں نے یونیورسٹی میں سکالرشپ کی جانچ پڑتال کے شفاف نظام پر روشنی ڈالی اور معاشرے کی تعمیر میں اس طرح کے اقدامات کی اہمیت پر زور دیا۔ انہوں نے کہا کہ یونیورسٹی قومی اور بین الاقوامی طلباء کو معیاری تعلیم مہیا کرتی ہے، اس طرح کا تعاون سماجی ترقی کے لیے اہم ہے۔

انہوں نے تعلیمی استعداد اور مالی ضرورت دونوں کو مدنظر رکھتے ہوئے میرٹ پر مبنی نقطہ نظر کے ذریعے مستحق اور قابل طلباء کی مدد کرنے کے یونیورسٹی کے عزم کا اعادہ بھی کیا۔اس موقع پر گفتگو کرتے ہوئے خالد ارشاد صوفی نے بتایا کہ کاروان علم فائونڈیشن اعلی معیاری تعلیم کے شعبہ میں تعاون فراہم کرنے والا اولین ادارہ ہے۔ انہوں نے طلباء کو تعلیمی سفر میں سرپرستی جیسے بارے بھی آگاہ کیا ۔

انہوں نے بتایا کہ فائونڈیشن اب تک 9,000 سکالرشپس دے چکی ہے۔ انہوں نے یونیورسٹی کے سکالرشپ کی جانچ پڑتال کےطریقہ کار کو سراہا اور اسے شفافیت اور انصاف کا نمونہ قرار دیا۔ قبل ازیں یونیورسٹی ایڈوانسمنٹ اینڈ فنانشل ایڈ کی ڈائریکٹر نزہت زرین نے شرکاء کو سکالرشپ اور ادارہ جاتی روابط اور ان کے دفتر کی سرگرمیوں کے بارے میں آگاہ کیا۔ انٹرنیشنل انسٹی ٹیوٹ آف اسلامک اکنامکس کے ڈائریکٹر جنرل اور سکالرشپ کمیٹی کے سربراہ ڈاکٹر عبدالرشید نے سکالرشپ کے لیے سخت معیاری طریقہ کار اور انتخاب کے بارے میں آگاہ کیا۔تقریب میں جامعہ کی سکالرشپ ایوارڈ کمیٹی کے وائس چیئرمین ڈاکٹر ساجد محمود، کاروان علم فائونڈیشن کے وفد کے ارکان اور یونیورسٹی کے عہدیداران نے بھی شرکت کی۔