پنجاب یونیورسٹی اورک کے زیر اہتمام تربیتی ورکشاپ کا انعقاد

جمعرات 19 دسمبر 2024 20:01

لاہور (اُردو پوائنٹ اخبارتازہ ترین - این این آئی۔ 19 دسمبر2024ء)پنجاب یونیورسٹی آفس ریسرچ انوویشن اینڈ کمرشلائزیشن (اورک ) کے زیر اہتمام ’پیٹنٹ ڈرافٹنگ اینڈ فائلنگ‘ انسٹیٹیوٹ آف کیمیکل انجینئرنگ اینڈ ٹیکنالوجی کے سیمینار ہال میںتربیتی ورکشاپ کا انعقاد کیا گیا۔اس موقع پر پنجاب یونیورسٹی کے پرو وائس چانسلر پروفیسر ڈاکٹر خالد محمود، ڈائریکٹر اورک پروفیسر ڈاکٹر عاقل انعام، سینئرآئی پی او ایگزامینرشاکرہ خورشید، ڈپٹی ڈائریکٹر اورک پروفیسر ڈاکٹر فرقان ہاشمی، ڈپٹی ڈائریکٹر آئی پی پروفیسر ڈاکٹر غزالہ یاسمین، فیکلٹی ممبران، محققین اور پوسٹ گریجویٹ طلبائوطالبات نے شرک کی۔

اپنے خطاب میں پروفیسر ڈاکٹر خالد محمود نے بہترین ورکشاپ کے انعقاد پر اورک کی ٹیم کو مبارکباد پیش کی ۔

(جاری ہے)

انہوں نے سائنسدانوں اور محققین کی حوصلہ افزائی کرتے ہوئے قومی اور بین الاقوامی سطح پرشناخت بنانے کیلئے مزید فعال کردار ادا کرنے پر زور دیا۔ انہوں نے تحقیق اور اختراع کی اہمیت پرروشنی ڈالتے ہوئے کہا کہ محققین اپنے پراجیکٹس کو کمرشلائز کرنے کے ساتھ ساتھ ان کا پیٹنٹ بھی حاصل کریں۔

انہوں نے علمی اور صنعتی روابط کو فروغ دینے بارے سیر حاصل بات چیت کی۔ شاکرہ خورشید نے دو سیشنز میں ہینڈز آن ٹریننگ کی، پہلا سیشن پیٹنٹ کی درخواست اور دعووں کے بنیادی اصولوں پر تھا، جس میں سائنس دانوں اور محققین کو آئی پی فائلنگ کی اہمیت اور تعلیمی اور تجارتی وابستگی میں اس کی اہمیت سے آگاہ کیا گیا۔ دوسرا سیشن پیٹنٹ کلیمز پر ہینڈ آن ٹریننگ پر مشتمل تھا۔

پروفیسر ڈاکٹر عاقل انعام نے پنجاب یونیورسٹی کے مختلف شعبہ جات سے شرکاء اور فیکلٹی ممبران کو خوش آمدید کہا۔ انہوں نے اورک کے امور اور یونیورسٹی میں تحقیق اور اختراعی کلچر کو فروغ دینے میں اس کے اہم کردار بارے بتایا۔ انہوں نے ڈاکٹر فرقان ہاشمی، پروفیسر ڈاکٹر غزالہ یاسمین و دیگر کی کاوشوں کو سراہا۔ بعدا زاں شرکاء کو اعزازی شیلڈز اور تعریفی اسناد سے نوازا گیا۔