بین الاقوامی یونیورسٹی میں واٹر فلٹریشن پلانٹ کا افتتاح

اسلام آباد(اُردو پوائنٹ اخبارتازہ ترین - این این آئی۔ 01 جنوری2025ء)بین الاقوامی اسلامی یونیورسٹی اسلام آباد کے صدر پروفیسر ڈاکٹر احمد شجاع سید نے یونیورسٹی کے میل ہاسٹلز میں واٹر فلٹریشن پلانٹ کا افتتاح کردیا۔تفصیلا ت کے مطابق بین الاقوامی اسلامی یونیورسٹی اسلام آباد کے صدر پروفیسر ڈاکٹر احمد شجاع سید نے یونیورسٹی کے میل ہاسٹلز میں واٹر فلٹریشن پلانٹ کا افتتاح بدھ کے روزکیا۔

اس موقع پر نائب صدر جامعہ کی نمائندگی کرتے ہوے ڈائریکڑ انتظامی امور ڈاکٹر انعام الحق اور فلٹریشن پلانٹ کی تنصیب کرنے والے ادارے ہیلپنگ ہینڈ فار ریلیف اینڈ ڈویلپمنٹ پاکستان (ایچ ایچ آر ڈی) کی ٹیم کے نمائندے بھی صدر جامعہ کے ہمراہ تھے۔اس موقع پر خطاب کرتے ہوئے صدر جامعہ، پروفیسر ڈاکٹر احمد شجاع سید نے یونیورسٹی کی جانب سے طلبہ کو سہولیات فراہم کرنے کی اولین ترجیح کا اعادہ کرتے ہوئے کہا کہ جامعہ ایسے اقدامات تواتر سے جاری رکھے گی۔

(جاری ہے)

انہوں نے طلباء اور جامعہ کمیونٹی کے لیے پلانٹ کے فوائد پر روشنی ڈالی اور اس کی پائیداری کو یقینی بنانے کے لیے فالو اپ اور دیکھ بھال کے طریقہ کار کے قیام کی اہمیت پر زور دیا۔فلٹریشن پلانٹ، جس کی مالیت 2 ملین روپے ہے فی گھنٹہ 1000 لیٹر فلٹر شدہ پانی فراہم کرنے کی صلاحیت رکھتا ہے۔ اس منصوبے کا آغاز کرنل (ر) اطہر بابر، سابق پرووسٹ اور موجودہ چیف سیکیورٹی آفیسر نے علی رافع، اسسٹنٹ ڈائریکٹر ہاسٹلز، اور ایچ ایچ آر ڈی ٹیم کے تعاون سے کیا تھا۔

قبل ازیں، ڈاکٹر انعام الحق نے صدر کو اس اقدام کے بارے میں بریفنگ دی اور پلانٹ کی تنصیب میں ایچ ایچ آر ڈی کے تعاون کا اعتراف کیا۔ ایچ ایچ آر ڈی کے نمائندے بشمول ارشید بلوچ، منیجر ہیلتھ پروگرام؛ محمد عمران، سینئر پروگرام آفیسر؛ امجد محمود امجد، ڈائریکٹر پروگرامز؛ اور یوتھ پروگرام کے منیجر راحیل احمد بھی تقریب میں موجود تھے۔اس موقع پر ایچ ایچ آر ڈی کی طرف سے محمد عمران نے پلانٹ کے آپریشن، نگرانی اور دیکھ بھال کے بارے میں بتایا۔ انہوں نے پانی سے پیدا ہونے والی بیماریوں کی روک تھام اور طلباء کی تعلیمی اور جسمانی تندرستی میں اس کے کردار پر بھی روشنی ڈالی۔