پنجاب یونیورسٹی ہیلی کالج آف بینکنگ اینڈ فنانس کے زیر اہتمام طلبا کے بزنس پراجیکٹس کی نمائش کا انعقاد

جمعہ 3 جنوری 2025 22:59

لاہور (اُردو پوائنٹ اخبارتازہ ترین - اے پی پی۔ 03 جنوری2025ء) پنجاب یونیورسٹی ہیلی کالج آف بینکنگ اینڈ فنانس کے زیر اہتمام بزنس مینجمنٹ پروگرام کے کامیاب سمسٹر کی تکمیل کے سلسلے میں طلبا کی طرف سے پیش کیے گئے فائنل ٹرم کے جدید پراجیکٹس کی نمائش کا انعقاد کیا گیا۔تقریب کے انعقاد کا مقصد طلبا میں تخلیقی سوچ، کاروباری جذبے اور عملی مہارت کو تقویت فراہم کرنا ہے۔

تقریب میں نئے کاروباری آئیڈیاز، پراڈکٹس اور خدمات کی نمائش کی گئی،جس نے طلبا کی سوچ اور حقیقی دنیا کے چیلنجوں سے نمٹنے کی صلاحیت کو ظاہرکیا۔اپنے خطاب میں پرنسپل ہیلی کالج آف بینکنگ اینڈ فنانس ڈاکٹر احمد منیب مہتا کا کہنا تھا کہ وہ طلبا کے جدید پراجیکٹس کو دیکھ کر بہت پرجوش ہیں، جو واقعی وقت کی ضرورت ہے۔

(جاری ہے)

انہوں نے مزید کہا کہ یہ منصوبے نہ صرف ہمارے طلبا کی تخلیقی صلاحیتوں اور کاروباری جذبے کو ظاہر کرتے ہیں بلکہ ایک جامع تعلیم فراہم کرنے کے لیے کالج کے عزم کو بھی اجاگر کرتے ہیں جو طلبا کو 21ویں صدی کے چیلنجوں کے لیے تیار کرتی ہے۔

انہوں نے کہا کہ وائس چانسلر پنجاب یونیورسٹی ڈاکٹر محمد علی کے ویژن کے مطابق، پائیداری پر ہماری توجہ صرف تھیوری پر نہیں ہے، یہ عملی اطلاق اور اپنے طلبا کو مثبت اثر ڈالنے کے لیے بااختیار بنانے کے بارے میں ہے۔ انہوں نے کہا کہ کالج انٹرپرینیورشپ اور پائیداری میں اپنے اقدامات کو جاری رکھنے اور بڑھانے کا ارادہ رکھتا ہے۔