یو ای ٹی پشاور کے طالب علم توصیف نواب نے ا نٹرپرینیورشپ ایوارڈجیت لیا

منگل 7 جنوری 2025 17:43

پشاور (اُردو پوائنٹ اخبارتازہ ترین - اے پی پی۔ 07 جنوری2025ء) یونیورسٹی آف انجینئرنگ اینڈ ٹیکنالوجی پشاور کے شعبہ انڈسٹریل انجینئرنگ کے ساتویں سمسٹر کے طالب علم توصیف نواب نے ''نسٹ ایکس یو این ڈی پی انوویشن اینڈ انٹرپرینیورشپ ایوارڈ'' کے طلبہ کیٹیگری میں کامیابی حاصل کرکے ایوارڈ جیت لیاجس کا اہتمام یو این ڈی پی اور یو ایس ایڈ کے تعاون سے نسٹ اسلام آباد نے کیا تھا۔

توصیف نواب کو بزنس ڈیولپمنٹ سپورٹ فنڈ کے تحت 10 لاکھ روپے کی گرانٹ دی جائے گی اور انہیں اپنی کاروباری آئیڈیا کو مزید بہتر بنانے کے لیے خصوصی انکیوبیشن پروگرام میں شرکت کی دعوت بھی دی گئی ہے۔ ان کا منصوبہ خیبر پختونخوا کے ایک اہم ماحولیاتی مسئلے کو حل کرنے کیلئے ایک اہم پیش رفت ہے۔خیبر پختونخوا میں 700 سے زائد ماربل کے کارخانوں سے سالانہ 300 ٹن سے زائد ماربل سلری ویسٹ (مائع فضلہ) پیدا ہوتا ہے جو زرعی زمینوں اور آبی ماحولیاتی نظام کو بری طرح متاثرہ کرتی ہے۔

(جاری ہے)

توصیف کا آئیڈیاماربل ویسٹ کو دوبارہ استعمال کرتے ہوئے ٹف ٹائلز اور کرپ اسٹونز تیار کرنا ہے جو ماحول دوست اور کم لاگت متبادل فراہم کرتا ہے جس سے زرعی زمینوں کو نقصانات سے بچایا جا سکتا ہے۔ یو ای ٹی پشاور کی انتظامیہ اپنے اس ابھرتے ہوئے انٹرپرینیور کو اس اختراعی آئیڈیا کی کامیابی پر خراج تحسین پیش کرتی ہے جوپائیدار زرعی ترقی کے لیے ناگزیر ہے اور امید کرتی ہے کہ ان کا یہ منصوبہ جلد حقیقت میں تبدیل ہوگا۔