Live Updates

جب حکومت کے پاس اختیار نہیں تو مذاکرات میں کیوں بیٹھے ہیں؟ شعیب شاہین

عمران خان کا کہنا ہے مذاکرات ان سے ہونے چاہئیں جن کے پاس اصل طاقت ہے، ہمارے دو معصومانہ مطالبات ہیں ایک جوڈیشل کمیشن اور دوسراقیدیوں کی رہائی ہے، وکیل بانی پی ٹی آئی کی جیل کے باہر میڈیا سے گفتگو

فیصل علوی جمعہ 10 جنوری 2025 15:17

جب حکومت کے پاس اختیار نہیں تو مذاکرات میں کیوں بیٹھے ہیں؟ شعیب شاہین

راولپنڈی(اردوپوائنٹ اخبار تازہ ترین۔10 جنوری 2025)بانی پی ٹی آئی عمران خان کے وکیل شعیب شاہین کا کہنا ہے کہ جب حکومت کے پاس اختیار نہیں تو مذاکرات میں کیوں بیٹھے ہیں؟، بانی پی ٹی آئی عمران خان کا کہنا ہے مذاکرات ان سے ہونے چاہئیں جن کے پاس اصل طاقت ہے، راولپنڈی کی اڈیالہ جیل کے باہر میڈیا سے گفتگو کرتے ہوئے وکیل بانی پی ٹی آئی نے کہا کہ ہمارے دو معصومانہ مطالبات ہیں ایک جوڈیشل کمیشن اور دوسراقیدیوں کی رہائی ہے ۔

ہم نے ان سے کہا ہے کہ سیاسی انتقامی کارروائی نہیں ہونی چاہیے اور ہم یہ بھی کہہ رہے ہیں مزیدمقدمات بازی بھی ختم ہونی چاہیے۔ حکومتی مذاکراتی کمیٹی کے رکن عرفان صدیقی نے کہا ہے ہم سے وہ مطالبہ کرو جس کا ہمارے پاس اختیار ہے۔ جب حکومت کے پاس اختیار نہیں تو مذاکرات میں کیوں بیٹھے ہیں؟ ۔

(جاری ہے)

انہوں نے کہا کہ ہمارے مذاکراتی کمیٹی کے ترجمان صاحبزادہ حامد رضا ہیں مذاکرات کے حوالے سے جو بات کرنی ہوگی وہ صرف صاحبزادہ حامد رضا کریں گے۔

ہم الزام تراشی نہیں کررہے ہم سچ بولتے ہیں بانی پی ٹی آئی عمران خان نے کہا ہے مذاکرات ان سے ہونے چاہئیں جن کے پاس اصل طاقت ہے۔صحافیوں سے گفتگو کرتے ہوئے وکیل بانی پی ٹی آئی شعیب شاہین کا مزید کہنا تھا کہ جوڈیشل کمیشن بنانے کیلئے کیا ایک سال چاہیے۔ جوڈیشل کمیشن میں 26 نومبر کی پوری تحقیقات ہونی چاہیے۔ جوڈیشل کمیشن فوری طور پر بننا چاہیے تاکہ اصل حقائق سامنے آسکیں ۔

26 نومبر سے قبل مذاکرات ایک ٹریپ تھا مذاکراتی کمیٹی کو آج تک ملنے نہیں دیا گیا جس سے مذاکرات میں حکومت کی سنجیدگی واضح نظر آ رہی ہے۔ آج علیمہ خان کو بھی اڈیالہ جیل کے اندر جانے سے روکا گیا کیونکہ وہ بولتی ہیں۔ان کا یہ بھی کہنا تھا کہ بانی پی ٹی آئی عمران خان نے کہاکہ حکومت نے معیشت کو تباہ کیا ہے۔عمران خان نے کہاکہ معیشت کی بہتری کیلئے قانون کی حکمرانی ضروری ہے ۔بانی پی ٹی آئی نے کہا معیشت کیلئے سرمایہ کاری ضروری ہے۔حکومت کہہ رہی معیشت بہتر ہوگئی جبکہ ایک کروڑ سے زائد لوگ غربت کی لکیر سے نیچے چلے گئے ہیں۔