عمران اشرف کی بہن ہونے کا دعوی کرنے والی خاتون کے بیان پر اداکار کا ردِعمل

بدھ 22 جنوری 2025 22:52

لاہور(اُردو پوائنٹ اخبارتازہ ترین - آن لائن۔ 22 جنوری2025ء)معروف پاکستانی اداکار اور میزبان عمران اشرف کی مبینہ بہن، شازیہ اشرف اعوان، کا ایک بیان سوشل میڈیا پر زیرِ بحث ہے، جس میں انہوں نے خود کو عمران اشرف کی حقیقی بہن قرار دیا ہے تاہم اب اداکار نے اس پر اپنا ردعمل دے دیا ہے۔ شازیہ نامی خاتون کا کہنا ہے کہ عمران اشرف اپنے سگے بہن بھائیوں کو تسلیم کرنے سے انکاری ہیں۔

انہوں نے کہا کہ عمران اشرف کو اپنی بہنوں کے سر پر ہاتھ رکھنا چاہیے۔اپنے انٹرویو میں شازیہ نے دعوی کیا کہ انہوں نے عمران اشرف کو بڑی دعاں کے بعد پایا تھا، کیونکہ ان کے ایک بھائی علی عباس کا انتقال ہو گیا تھا۔ تاہم، شازیہ کے مطابق شہرت حاصل کرنے کے بعد عمران اشرف نے ان سے تعلق ختم کر لیا ہے، جو ان کے لیے انتہائی افسوسناک ہے۔

(جاری ہے)

انہوں نے مزید کہا کہ عمران اشرف ایک محنتی شخص ہیں اور انہوں نے ماں اور بہنوں کی دعاں سے کامیابی حاصل کی ہے، لیکن رشتوں کی اہمیت کو نہیں بھولنا چاہیے۔

شازیہ اشرف نے کہا کہ وہ عمران اشرف کی بہن کے طور پر اپنی شناخت چاہتی ہیں اور ان کا ماننا ہے کہ عمران شاید ان سے اس وجہ سے نہیں ملتے کیونکہ وہ طلاق یافتہ ہیں اور ممکنہ طور پر میڈیا میں کسی تنازعے کا شکار ہونے سے گھبرا رہے ہیں۔میڈیا رپورٹس کے مطابق اداکار عمران اشرف نے خاتون کے دعوے کو مسترد کرتے ہوئے اس کی تردید کی ہے۔واضح رہے کہ عمران اشرف ایک ورسٹائل اور باصلاحیت اداکار اور میزبان ہیں۔ وہ مقبول ٹی وی ڈراموں جیسے رانجھا رانجھا کردی، دل لگی، الف اللہ اور انسان، رقصِ بسمل، مشک، کہیں دیپ جلے، سے شہرت حاصل کر چکے ہیں۔ اس وقت وہ ایک نجی چینل کے مشہور کامیڈی ٹاک شو مذاق رات کی میزبانی کر رہے ہیں۔