پرانے ڈرامے کے بولڈ سین کا کلپ وائرل، دانش تیمور کو تنقید کا سامنا

منگل 30 ستمبر 2025 19:52

کراچی (اُردو پوائنٹ اخبارتازہ ترین - آن لائن۔ 30 ستمبر2025ء)پاکستانی شوبز انڈسٹری کے معروف اداکار دانش تیمور بولڈ سین کرنے پر ایک بار شدید تنقید کی زد میں آگئے۔گزشتہ کچھ سالوں کے دوران دانش تیمور جتنے بھی ڈراموں میں نظر آئے وہ تمام ڈرامے ہی بہت مقبول ہوتے نظر آئے۔اداکار کو مقبول ڈراموں میں جارحانہ انداز میں دیکھ کر ان کے مداحوں کے ذہنوں میں ان کا ایک خاص انداز نقش ہوگیا ہے اور اب وہ اُنہیں اسی طرح کے کرداروں میں دیکھنا پسند کرتے ہیں۔

اس حوالے سے سوشل میڈیا پر یہ بحث بھی چھڑی تھی کہ دانش تیمور کو ہمیشہ ایک ہی طرح کے کرداروں میں کاسٹ کیا جاتا ہے جبکہ بطور اداکار ان کو مختلف قسم کے کردار ادا کرنے چاہئیں تاکہ یہ پتہ چل سکے کہ وہ کتنے باصلاحیت اداکار ہیں۔

(جاری ہے)

اس کے علاوہ، دانش تیمور کو حال ہی میں ڈرامہ سیریل ’من مست ملنگ‘ میں کام کرنے پر بھی تنقید کا سامنا کرنا پڑا تھا کیونکہ اس ڈرامے میں ان کے کئی بولڈ سین تھے۔

اب سوشل میڈیا پر ان کے پرانے ڈرامے کا سین وائرل ہوگیا ہے جو کہ غالباًً 2008ء میں نشر ہوا تھا۔سوشل میڈیا پر وائرل ہونے والے ڈرامے کے سین میں دانش تیمور اور جیا علی کو بولڈ کرداروں میں دیکھا جا سکتا ہے۔یہ وائرل ویڈیو دیکھ کر سوشل میڈیا صارفین دنگ رہ گئے اور یہ سوال کر رہے ہیں کہ آخر یہ ڈرامہ پاکستان ٹیلی ویژن پر نشر کرنے کی اجازت کیسے ملی۔