محکمہ زراعت پنجاب نے کینو کی برداشت وسنبھال بارے سفارشات جاری کر دیں

ہفتہ 25 جنوری 2025 17:55

لاہور (اُردو پوائنٹ اخبارتازہ ترین - اے پی پی۔ 25 جنوری2025ء) محکمہ زراعت نے کینو کی برداشت اور سنبھال بارے سفارشات جاری کر دیں، ترجمان محکمہ زراعت پنجاب کے مطابق پاکستان میں ترشاوہ پھلوں کا 95فیصد حصہ صوبہ پنجاب میں سرگودھا، منڈی بہائوالدین، ٹوبہ ٹیک سنگھ، اوکاڑہ، ساہیوال، بہاول پور، رحیم یار خان، لیہ اور ڈیرہ غازی خان پر مشتمل ہے، ترشاوہ پھلوں میں سب سے زیادہ کاشت کنو کی ہے۔

محکمہ زراعت پنجاب کے ترجمان نے کہا کہ کینو کے پودے کو پھول سے لیکر پختہ یا مکمل پھل تیار ہونے کیلئے تقریبا300 دن کا عرصہ درکار ہوتا ہے۔ صوبہ پنجاب میں کینو کی برداشت جنوری کے آخر سے ماہ مارچ تک کی جاتی ہے، باغبان اس وقت برداشت کریں جب اس کی جلد کا رنگ مکمل طور پر سبز سے پیلا ہو جائے اور اس میں مٹھاس 10 سے12 فیصد ہونی چاہیے۔

(جاری ہے)

باغبان برداشت کرتے وقت پھل کو ڈنڈی سے توڑتے ہیں یا پھر پھل کو ہاتھ سے کھینچ کر درانتی یا قینچی سے ڈنڈی و پتوں سمیت توڑلیا جاتا ہے ، ٹہنیاں ہلاکر بھی پھل کو زمین پر گرایا جا تا ہے، اس طرح سے ایک تو پھل زخمی ہو جا تا اور دوسرا یہ کہ درخت سے پتوں کا بہت زیادہ نقصان ہو جاتا ہے۔

پھل کو زیادہ نمی میں نہ توڑا جائے تاکہ پھل کاچھلکا پھٹ جانے کی وجہ سے یا زخمی ہونے کی وجہ سے اس پر مختلف بیماریاں حملہ آور نہ ہوں جو کہ پھل کے گلنے سڑنے کا باعث بن سکیں۔ اسی طرح پھل کو خشک موسم میں قینچی کی مدد سے احتیاط کے ساتھ ڈنڈی کے بالکل قریب سے کا ٹا جاناچا ہیے تا کہ دوسرے پھل ڈنڈی کی وجہ سے زخمی نہ ہوں۔