وزیرداخلہ کی امریکہ میں چین مخالف تقریب میں شرکت کی خبروں کی تردید

نوجوانوں کی ایک تقریب میں میری شرکت کو غلط رنگ دیا جا رہا ہے، مخالفین زہریلا پروپیگنڈا کر رہے ہیں، اس قسم کے پروپیگنڈے سے کوئی فرق نہیں پڑتا؛ محسن نقوی کی میڈیا سے گفتگو

Sajid Ali ساجد علی اتوار 26 جنوری 2025 11:02

وزیرداخلہ کی امریکہ میں چین مخالف تقریب میں شرکت کی خبروں کی تردید
ہیوسٹن ( اُردو پوائنٹ اخبارتازہ ترین۔ 26 جنوری 2025ء ) وفاقی وزیرداخلہ محسن نقوی نے امریکہ میں چین مخالف تقریب میں شرکت کی خبروں کی تردید کردی۔ ہیوسٹن میں میڈیا سے گفتگو کرتے ہوئے انہوں نے کہا کہ امریکہ میں چین مخالف کسی بھی تقریب میں شرکت نہیں کی، اس حوالے سے مخالفین کی جانب سے زہریلا پروپیگنڈا کیا جا رہا ہے، نوجوانوں کی ایک تقریب میں میری شرکت کو غلط رنگ دیا جا رہا ہے لیکن کسی بھی اینٹی چائنہ فنکشن میں نہیں گیا اور اس قسم کے پروپیگنڈے سے کوئی فرق نہیں پڑتا۔

وزیر داخلہ نے بتایا کہ میرے دورۂ امریکہ کا مقصد دہشت گردی کے خلاف ایک مؤثر حکمتِ عملی ترتیب دینا ہے کیوں کہ دہشت گردی صرف پاکستان کی جنگ نہیں بلکہ یہ سب کی مشترکہ لڑائی ہے اور پاکستان کے خلاف ہتھیار اٹھانے والوں سے آہنی ہاتھوں سے نمٹا جائے گا، اس سلسلے میں میرا دورہ امریکہ مقامی سیاستدانوں سے ملاقاتوں پر مشتمل ہے جن کا مقصد دہشت گردی کے خلاف مل کر ایک مؤثر پلان بنانا ہے۔

(جاری ہے)

محسن نقوی کا کہنا ہے کہ امریکہ کے ایوان نمائندگان کو پاکستان کے خلاف اکسایا جا رہا ہے لیکن سیاست اس حد تک نہیں ہونی چاہیئے کہ پاکستان کو نقصان ہو، پاکستان کے مسائل کے حل کے لیے عالمی برادری کا تعاون ضروری ہے، میری کانگریس اراکین کے ساتھ ملاقاتیں انتاہئی مثبت رہیں، اس دوران دونوں ممالک کے درمیان تعلقات کو مزید مضبوط کرنے کے لیے مختلف پہلوؤں پر بات چیت کی گئی۔