عالمی مارکیٹ میں کوکنگ آئل سستا ہونے کے باوجود پاکستان میں کوکنگ آئل مہنگا ہو گیا

رمضان المبارک سے قبل عوام کیلئے مہنگائی کا ایک اور تحفہ، ، رمضان میں قیمتوں میں مزید اضافہ ہونے کا خدشہ

محمد علی منگل 4 فروری 2025 20:33

عالمی مارکیٹ میں کوکنگ آئل سستا ہونے کے باوجود پاکستان میں کوکنگ آئل ..

لاہور (اُردو پوائنٹ اخبارتازہ ترین۔ 04 فروری2025ء) رمضان المبارک سے قبل عوام کیلئے مہنگائی کا ایک اور تحفہ، عالمی مارکیٹ میں کھانا پکانے والا تیل سستا ہونے کے باوجود پاکستان میں خوردنی تین مہنگا ہو جانے کا انکشاف، رمضان میں قیمتوں میں مزید اضافہ ہونے کا خدشہ۔ تفصیلات کے مطابق ووزیر خزانہ محمد اورنگزیب کی زیر صدارت ہونے والے حالیہ اقتصادی رابطہ کمیٹی کے اجلاس میں ارکان نے چینی، کوکنگ آئل اور سبزیوں کی قیمتوں میں اضافے پر برہمی کا اظہار کرتے ہوئے وزارت خوراک و غذائی تحفظ سے دو ہفتوں میں رپورٹ طلب کرلی۔

اجلاس کے دوران اقتصادی رابطہ کمیٹی نے وزارت خوراک سے چینی، کوکنگ آئل اور دالوں کے ذخائر کی رپورٹ بھی مانگ لی۔ اجلاس کے دوران انکشاف ہوا کہ عالمی مارکیٹ میں کھانا پکانے والے تیل کی قیمتوں میں کمی ہوئی تاہم پاکستان میں کھانا پکانے والا تیل مہنگا ہو گیا ہے۔

(جاری ہے)

اس حوالے سے پاکستان بزنس فورم نے خبردار کیا ہے کہ آئندہ ماہ رمضان کے دوران کوکنگ آئل اور گھی کی ممکنہ قلت کا خدشہ ہے کیونکہ کسٹم کلیئرنس کے مسائل کی وجہ سے پورٹ قاسم پرتقربیاً3لاکھ ٹن پام آئل پھنسا ہوا ہے۔

صدر پاکستان بزنس فورم خواجہ محبوب الرحمن نے بتایا کہ نئے نافذ کیے گئے فیس لیس کسٹمز سسٹم نے خوردنی تیل کی کلیئرنس کو بری طرح متاثر کیا ہے جس سے ملک بھر میں سپلائی چین متاثر ہوئی ہے۔کلیئرنس میں تاخیر کی وجہ سے پھنسے ہوئے جہازوں پر 50 سے 60 ڈالر فی ٹن ڈیمریج چارجز عائد ہورہے ہیں۔خواجہ محبوب نے کہا کہ گزشتہ ایک ہفتے کے دوران کوکنگ آئل کی قیمتوں میں پہلے ہی 10 روپے فی کلو اضافہ ہوا ہے۔ اگر یہی صورتحال رہی تو رمضان المبارک میں قیمتوں میں 25 سے 30 روپے فی کلو اضافہ ہوسکتا ہے۔