قومی اسمبلی کی قائمہ کمیٹی برائے بین الصوبائی رابطہ کا اجلاس ،پنجاب کے سیکرٹری مواصلات اورتعمیرات کی غیر حاضری پر برہم

اسلام آباد (اُردو پوائنٹ اخبارتازہ ترین - این این آئی۔ 06 فروری2025ء)قومی اسمبلی کی قائمہ کمیٹی برائے بین الصوبائی رابطہ نے پاکستان فٹبال فیڈریشن کے معاملات کی مزید جانچ کے لیے، کمیٹی نے ایک ذیلی کمیٹی تشکیل دیدی ہے جس کی سربراہی ایم این اے انجم عقیل کریں گے۔قومی اسمبلی کی قائمہ کمیٹی برائے بین الصوبائی رابطہ کا اجلاس جمعہ کو وزارت آئی پی سی کے کمیٹی روم میں منعقد ہوا۔

اجلاس کی صدارت رکن قومی اسمبلی محمد ثنااللہ خان مستی خیل نے کی۔ اجلاس میں کلور کوٹ پل، پاکستان فٹبال فیڈریشن اور پبلک سیکٹر ڈویلپمنٹ پروگرام (PSDP) کے منصوبوں پر بریفنگ دی گئی۔نیشنل ہائی وے اتھارٹی کے جنرل منیجر (ڈیزائن) نے کمیٹی کو لنکنگ اور اپروچ سڑکوں کی تعمیر پر بریفنگ دی۔ اجلاس میں خیبرپختونخوا ، پنجاب، وفاقی پلاننگ کمیشن، اور وزارت مواصلات کے نمائندوں نے شرکت کی۔

(جاری ہے)

تاہم، کمیٹی نے پنجاب کے سیکریٹری مواصلات اور تعمیرات (C&W) کی غیر حاضری پر برہمی کا اظہار کیا۔ تفصیلی غور و خوض کے بعد، کمیٹی نے ایڈیشنل سیکرٹری آئی پی سی کو تمام متعلقہ فریقین کے ساتھ اجلاس بلانے کی ہدایت دی۔ ایڈیشنل سیکریٹری نے کمیٹی کو آگاہ کیا کہ ایک نیا ٹوپوگرافک سروے کرایا جائے گا اور PC-1 کی منظوری درکار ہوگی۔ تاہم، مالی سال 2025-26 کے لیے PSDP اور ایشیائی ترقیاتی بینک (ADB) کے منصوبوں کے تحت وفاقی اور صوبائی سطح پر بجٹ مختص کیا جا چکا ہے۔

کمیٹی نے چیف سیکریٹریز اور C&W پنجاب و خیبرپختونخوا کے سیکرٹریز کو ایک ماہ کے اندر پل کی تعمیر پر اپڈیٹ دینے کی ہدایت دی۔ کمیٹی نے اس منصوبے کو قومی سطح پر ایک اہم انفراسٹرکچر منصوبہ قرار دیا اور کہا کہ اس میں کسی قسم کی تاخیر سے بھاری مالی نقصان ہو سکتا ہے۔ اس منصوبے کو خیبرپختونخوا، پنجاب اور بلوچستان کے عوام کے لیے بہتر سفری سہولیات فراہم کرنے کے تناظر میں انتہائی اہم قرار دیا گیا۔

پاکستان فٹبال فیڈریشن (PFF) کے چیئرمین نارملائزیشن کمیٹی، ہارون ملک نے کمیٹی کو PFF کے انتخابی عمل پر بریفنگ دیجو ضلعی سطح سے شروع ہوا تھا۔ انہوں نے آگاہ کیا کہ تمام انتخابات مکمل ہو چکے ہیں، اور 22 منتخب کانگریس ممبران اگلے مرحلے کی نگرانی کریں گے۔ انہوں نے یہ بھی بتایا کہ پہلی بار پاکستان فٹبال فیڈریشن نے 2023 اولمپک کوالیفائرز میں شرکت کی اور دوسرے مرحلے تک رسائی حاصل کی۔

انہوں نے کمیٹی کو یقین دلایا کہ وہ کسی بھی PFF انتخاب یا عہدے کے امیدوار نہیں ہیں۔ کمیٹی نے اولمپک سطح پر فٹبال کے فروغ کے لیے PFF کی کاوشوں کو سراہا۔ سابق PFF صوبائی صدر سردار نوید حیدر نے بھی کمیٹی کو بریفنگ دی اور فیڈریشن کے معاملات پر اپنے تحفظات کا اظہار کیا۔پاکستان فٹبال فیڈریشن کے معاملات کی مزید جانچ کے لیے، کمیٹی نے ایک ذیلی کمیٹی تشکیل دی، جس کی سربراہی ایم این اے انجم عقیل کریں گے۔

دیگر اراکین میں ایم این اے ڈاکٹر مہریں رزاق بھٹو اور ایم این اے جمشید احمد دستی شامل ہوں گے۔ پاکستان اسپورٹس بورڈ کے ڈائریکٹر جنرل (DG) اور ڈپٹی ڈی جی، ساتھ ہی آزاد فٹبالر جناب سہیب بھی اس ذیلی کمیٹی کی معاونت کریں گے۔ یہ ذیلی کمیٹی PFF کانگریس ممبران کے ساتھ بات چیت کرے گی اور PFF کانگریس میں تین خواتین ممبران کی تقرری کا جائزہ لے گی۔

اجلاس میں ممبران قومی اسمبلی انجم عقیل خان، شیخ آفتاب احمد، سردار محمد یعقوب خان ناصر، محترمہ شائستہ خان، حاجی رسول بخش چانڈیو، سیدہ شہلا رضا، ڈاکٹر مہریں رزاق بھٹو، محمد اقبال خان، خواجہ اظہار الحسن، محمد مقداد علی خان، جمشید احمد، اور سید سمیع اللہ سمیت ایڈیشنل سیکریٹری IPC، NHA، خیبرپختونخوا و پنجاب کے نمائندے، اور دیگر حکام و افسران نے بھی اجلاس میں شرکت کی۔