سابق جج ارشد ملک کی اہلیہ کی پنشن کامعاملہ،رجسٹرار لاہور ہائی کورٹ ذاتی حیثیت میں طلب

جمعہ 7 فروری 2025 15:28

اسلام آباد(اُردو پوائنٹ اخبارتازہ ترین - این این آئی۔ 07 فروری2025ء)سابق جج ارشد ملک کی اہلیہ کی پنشن کے معاملے پر عدالت نے رجسٹرار لاہور ہائی کورٹ کو نوٹس جاری کرکے ذاتی حیثیت میں طلب کرلیا۔تفصیلات کے مطابق سپریم کورٹ میں سابق جج ارشد ملک کی اہلیہ کی پینشن کیلئے دائر درخواست کی سماعت ہوئی۔عدالت نے رجسٹرار لاہور ہائی کورٹ کو نوٹس جاری کرتے ہوئے آئندہ سماعت پر ذاتی حیثیت میں پیش ہونے کی ہدایت کی ہے۔

(جاری ہے)

درخواست گزار کے وکیل نے موقف اختیار کیا کہ جج ارشد ملک کو لاہور ہائی کورٹ نے برطرف کیا تھا،ارشد ملک سیاسی افراد کے ریفرنس سن رہے تھے۔ جسٹس حسن اظہر رضوی نے ریمارکس دئیے کہ جج کا کیا کام ہے کہ وہ سیاسی افراد سے گھروں میں ملاقاتیں کرے۔درخواست گزار کے وکیل نے کہا کہ برطرفی کے خلاف اپیل زیرالتواء تھی جب ارشد ملک کا انتقال ہوا، قانون کے مطابق نظرثانی یا اپیل صرف متاثرہ جج کر سکتا ہے بیوہ نہیں،انسانی بنیادوں پر استدعا ہے کہ ارشد ملک کی برطرفی کو جبری ریٹائر منٹ میں تبدیل کیا جائے۔