یونیورسٹی آف سرگودھا میں ”پنجاب ٹرانسپیرنسی اینڈ رائیٹ ٹو ا نفارمیشن ایکٹ2013“ کے حوالے سے آگاہی سیمینار

پیر 10 فروری 2025 21:06

سرگودھا (اُردو پوائنٹ اخبارتازہ ترین - اے پی پی۔ 10 فروری2025ء) یونیورسٹی آف سرگودھا میں آفس آف ایونٹ مینجمنٹ اور ڈائریکٹوریٹ آف سٹوڈنٹ افیئرز کے زیر اہتمام ”پنجاب ٹرانسپیرنسی اینڈ رائیٹ ٹو ا نفارمیشن ایکٹ2013“ کے حوالے سے آگاہی سیمینار کا انعقاد کیا گیا۔ تقریب کے مہمانِ خصوصی ڈائریکٹر اویرنس پنجاب انفارمیشن کمیشن نعمان نذیر تھے جبکہ اس موقع پر ڈائریکٹر ریاض شاد ہم نصابی فورم ڈاکٹر محمد منیر گجر،ڈائریکٹر سٹوڈنٹ افیئرز ڈاکٹر محمود الحسن اور طلباء و طالبات بڑی تعداد میں موجود تھے۔

سیمینار سے خطاب کرتے ہوئے نعمان نذیر نے معلومات تک رسائی کے حق سے متعلق قوانین کے بارے میں طلبہ کو آگاہی دی۔ انہوں نے معلومات کے حصول کو یقینی بنانے کے لیے پنجاب حکومت کی آر ٹی آئی ایپ کے بارے میں آگاہی دیتے ہوئے کہا کہ آر ٹی آئی ایپ پنجاب حکومت کی ایک ڈیجیٹل سہولت ہے جو شہریوں کو پنجاب ٹرانسپیرینسی اینڈ رائیٹ ٹو انفارمیشن ایکٹ 2013 کے تحت آن لائن معلومات حاصل کرنے کی سہولت فراہم کرتی ہے۔

(جاری ہے)

اس ایپ کے ذریعے شہری کسی بھی سرکاری ادارے سے معلومات کی درخواست کر سکتے ہیں، درخواست کا اسٹیٹس چیک کر سکتے ہیں اور اپنے حقوق سے متعلق رہنمائی حاصل کر سکتے ہیں۔ انہوں نے بتایا کہ شہری اپنی معلومات کی درخواست سرکاری ویب سائٹ یا موبائل ایپ کے ذریعے آن لائن جمع کرا سکتے ہیں۔درخواست دہندہ اپنی درخواست کے پراسیس کی تفصیلات جان سکتا ہے۔

اگر درخواست پر بروقت جواب نہ ملے تو شہری پنجاب انفارمیشن کمیشن سے شکایت درج کرا سکتے ہیں۔ ایپ اور ویب پورٹل پر آر ٹی آئی قوانین اور درخواست کے طریقہ کار سے متعلق مکمل معلومات دستیاب ہوتی ہیں۔ انہوں نے معلومات حاصل کرنے کے لیے درخواست سے لے کر پبلک انفارمیشن آفیسر کے جواب، معلومات کے حصول میں رکاوٹ کی صورت میں آر ٹی آئی کمپلینٹ اور 60دنوں کے اندر پنجاب انفارمیشن کمیشن کے جواب تک کے سارے مراحل کے بارے میں بھی آگاہ کیا۔ سیمینار سے ڈاکٹر محمد منیر گجر نے بھی خطاب کیا ۔