رنویر الہ آبادیا اپنے خلاف درج مقدمات پر سپریم کورٹ پہنچ گئے، تمام کیسز یکجا کرنے کی درخواست

جمعہ 14 فروری 2025 23:15

ممبئی (اُردو پوائنٹ اخبارتازہ ترین - این این آئی۔ 14 فروری2025ء)بھارتی یوٹیوبر رنویر الہ آبادیا اپنے خلاف درج مقدمات پر سپریم کورٹ پہنچ گئے۔بھارتی میڈیا رپورٹ کے مطابق رنویر الہ آبادیا نے سمے رائنا کے شو میں اپنے متنازع تبصرے کے خلاف درج مقدمات پر سپریم کورٹ کا رخ کیا ہے اور تمام کیسز کو یکجا کرنے کی درخواست کی۔بھارتی سپریم کورٹ کے چیف جسٹس سنجیو کھنہ نے درخواست گزار کے وکیل سے کہا کہ مقدمے کو جلد ہی سماعت کیلئے لسٹ کردیا جائے گا۔

مہاراشٹرا سائبر ڈپارٹمنٹ نے فحش مواد پر پوڈکاسٹر رنویر الہ آبادیا، کامیڈین سمے رائنا اور دیگر فنکاروں کے خلاف آئی ٹی ایکٹ کے تحت مقدمہ درج کیا اور درخواست کی گئی کہ کامیڈی شو کی تمام اقساط کو ہٹایا جائے۔سمے رائنا نے اپنے یوٹیوب چینل نے شو کی تمام اقساط کو ہٹادیا ہے، جن پر انہیں لاکھوں ویوز مل چکے تھے، کامیڈین نے تحقیقاتی اداروں کے ساتھ تعاون کو یقینی بنانے کے عزم کا اظہار کیا۔

(جاری ہے)

رنویر الہ آبادیا کے خلاف ایک کامیڈی شو میں مبینہ طور پر فحش تبصرے کے خلاف متعدد مقدمات درج کیے گئے ہیں، انہوں نے شو کے دوران نامناسب ریمارکس پر ایک ویڈیو پیغام میں معذرت بھی کی ہے۔بھارتی یوٹیوبر کی ویڈیو اور پروگرام میں کہے گئے الفاظ سوشل میڈیا پر تیزی سے وائرل ہوئے، جس پر انہیں تنقید اور مذمت کا سامنا ہے۔یوٹیوبر کے خلاف آسام، گوہاٹی سمیت کئی مقامات پر مقدمات درج کئے گئے ہیں۔