انتظامی مہارت اور شعبہ خبر میں مثالی خدمات پر جنرل منیجر پی ٹی وی ملتان شیراز درانی کو ایکسیلنس ایوارڈ سے نوازا گیا

اتوار 16 فروری 2025 16:00

ملتان (اُردو پوائنٹ اخبارتازہ ترین - اے پی پی۔ 16 فروری2025ء) پاکستان ٹیلی ویژن ملتان مرکز کے جنرل منیجر محمد شیراز درانی کو برطانیہ اور متحدہ عرب امارات کی دو تنظیموں کی جانب سے پروفیشنلزم کی کیٹیگری میں ایکسیلینس ایوارڈ سے نوازا گیا۔

(جاری ہے)

اتوار کو ملک بھر سے فنون لطیفہ کے شعبوں میں نمایاں کارکردگی کا مظاہرہ کرنے والے افراد میں برطانیہ اور متحدہ عرب امارات کی دو تنظیموں کی جانب سے عالمی اعزازات کی تقسیم کا انعقاد ہوا جس میں پاکستان ٹیلی ویژن ملتان مرکز کے جنرل منیجر محمد شیراز درانی کو بہترین انتظامی مہارت اور شعبہ خبر میں مثالی خدمات کے اعتراف میں پروفیشنلزم کی کیٹیگری میں ایکسیلینس ایوارڈ سے نوازا گیا۔

اس موقع پر شیراز درانی نے یہ ایوارڈ پاکستان ٹیلی ویژن کے نام کرتے ہوئے کہا کہ میرے ادارے کے پروفیشنلز اور سینیئرز کی رہنمائی کی بدولت انہیں یہ ایوارڈ ملا جس پر انہیں فخر ہے۔ تقریب میں فلم کے معروف ہدایتکار سید نور، اداکاروں غلام محی الدین، راشد محمود، عمران اشرف، گلوکار حامد علی خان اور ظہور لوہار سمیت فیشن، فن و ادب، ثقافت، تعلیم، صحت اور زراعت سمیت مختلف شعبوں میں نمایاں کارکردگی کا مظاہرہ کرنے والے افراد میں اعزازات تقسیم کئے گئے۔