پاکستان نیوی شپ ’’یرموک‘‘ پر استقبالیہ عشائیہ کا اہتمام، سیکرٹری دفاعی پیداوار نے مہمان خصوصی کی حیثیت سے شرکت کی

منگل 18 فروری 2025 20:10

ابو ظہبی (اُردو پوائنٹ اخبارتازہ ترین - اے پی پی۔ 18 فروری2025ء) پاکستان نیوی شپ ’’یرموک‘‘ پر استقبالیہ عشائیہ کی تقریب کا انعقاد کیا گیا۔ سیکرٹری برائے دفاعی پیداوار لیفٹیننٹ جنرل (ر) محمد چراغ حیدر نے بطور مہمان خصوصی عشائیہ کی تقریب میں شرکت کی۔ ابوظہبی میں پاکستانی سفارتخانہ کی جانب سے جاری بیان کے مطابق کمانڈنگ آفیسر پی این ایس یرموک نے اپنے خیر مقدمی کلمات میں بحر ہند کے علاقہ میں سمندری تحفظ کے لئے پاکستان بحریہ کی کاوشوں کو اجاگر کیا۔

(جاری ہے)

پاکستان کے سفیر فیصل نیاز ترمذی نے تقریب سے خطاب کرتے ہوئے علاقے میں استحکام اور سلامتی کے لیے پاکستان کی کوششوں کو اجاگر کرنے کے ساتھ ساتھ پاکستان اور یو اے ای کے باہمی تعلقات پر بھی روشنی ڈالی۔عشائیہ کا آغاز کیک کاٹنے کی تقریب کے ساتھ ہوا جس کے بعد روایتی لذیذ پاکستانی کھانوں سے مہمانوں کی تواضع کی گئی۔ تقریب میں متحدہ عرب امارات کے سینئر دفاعی عہدیداروں اور مختلف شعبہ ہائے حیات سے تعلق رکھنے والی ممتاز شخصیات نے شرکت کی۔