سورج مکھی موسم بہار اور موسم خزاں میں کامیابی سے کاشت کی جا سکتی ہے،خالد محمود

جمعہ 28 فروری 2025 13:31

فیصل آباد (اُردو پوائنٹ اخبارتازہ ترین - اے پی پی۔ 28 فروری2025ء) محکمہ زراعت کی جانب سے شمالی پنجاب کے کاشتکاروں کو ہدایت کی گئی ہے کہ وہ سورج مکھی کی کاشت مارچ کے پہلے ہفتہ میں مکمل کر لیں جبکہ جنوبی پنجاب میں بھی سورج مکھی کی بہاریہ کاشت کیلئے فروری کا مہینہ بہترین ہو تا ہے تاہم اگر کسی جگہ پر کاشتکارفروری میں فصل کاشت نہیں کرسکے اور اب کرنا چاہتے ہیں تو وہ کاشت کر سکتے ہیں۔

ڈائریکٹرمحکمہ زراعت توسیع فیصل آباد چوہدری خالد محمود نے بتایا کہ سورج مکھی ایک منافع بخش فصل ہے جس سے زمیندار 60سے70 ہزار روپے فی ایکڑ آمدنی حاصل کر سکتے ہیں۔ انہوں نے کہا کہ سورج مکھی موسم بہار اور موسم خزاں میں کامیابی سے کاشت کی جا سکتی ہے جس کے بیج میں 40سے 50فیصد تک اعلیٰ قسم کا تیل اور 20سے 22فیصد تک پر وٹین پائے جاتے ہیں۔

(جاری ہے)

انہوں نے کہا کہ سورج مکھی کا تیل صحت کےلئے مفید ہے جو انسانی جسم میں کولیسٹرول لیول کو کم کرنے میں مدد دیتا ہے۔

انہوں نے بتا یا کہ سورج مکھی کی کاشت مختلف فصلوں کے ساتھ ردو بدل میں کامیابی سے کاشت کی جا سکتی ہے جبکہ یہ اپنی گہری جڑوں کی وجہ سے پانی کی کمی بھی برداشت کرنے کی بھر پور صلاحیت رکھتی ہے اور کم خرچ کے باوجود فی ایکڑ 40سے 45من تک پیداوار دیتی ہے۔ انہوں نے کہاکہ سورج مکھی سیم زدہ اور زیادہ کلراٹھی زمین کے علاوہ جنوبی پنجاب، شمالی پنجاب، زیریں سندھ، بالائی سندھ، میدانی علاقوں اورپہاڑی علاقوں میں بآسانی کاشت کی جا سکتی ہے۔

انہوں نے بتا یا کہ زمین کی تیاری کےلئے ایک بار مٹی پلٹنے والا ہل ضرور چلایا جائے تاکہ پودوں کی جڑیں گہرائی تک جا سکیں اور بعد میں کلٹی ویٹر اور سہاگہ کی مدد سے بھی زمین کو تیار کیا جاسکتا ہے۔ انہوں نے بتا یا کہ آبپاشی کا دارو مدار موسمی حالات پر ہوتا ہے تاہم پہلا پانی فصل کی روئیدگی کے 20سے 30دن کے بعد دینا چاہیے۔ اس ضمن میں محکمہ زراعت کی ہیلپ لائن یا قریبی ماہرین زراعت سے بھی رابطہ کیا جا سکتا ہے۔