درجہ حرارت 20سے30سینٹی گریڈ ہونے پر بھنڈی توری کی کاشت شروع کردیں،نظامت زرعی اطلاعات

جمعہ 28 فروری 2025 13:43

فیصل آباد (اُردو پوائنٹ اخبارتازہ ترین - اے پی پی۔ 28 فروری2025ء) نظامت زرعی اطلاعات محکمہ زراعت کے ترجمان نے کاشتکاروں کو مشورہ دیا کہ وہ درجہ حرارت 20 سے 30 سینٹی گریڈ ہونے پر بھنڈی توری کی کاشت شروع کردیں کیونکہ بھنڈی توری کے لیے گرم مرطوب آب وہوا کی ضرورت ہے جبکہ بھنڈی پنجاب کے اکثر علاقوں میں کاشت کی جاتی ہے لیکن اس کی زیادہ کاشت فیصل آباد، کمالیہ، ساہیوال، چشتیاں میں ہوتی ہے۔

(جاری ہے)

انہوں نے بتایا کہ بھنڈی توری کیلئے ذرخیز میرا اور پانی کے بہتر نکاس والی زمین کا انتخاب کیاجائے اورکاشتکاربھنڈی توری کی بوائی کیلئے 10 سے 12 کلوگرام بیج فی ایکڑ استعمال کریں۔انہوں نے کہاکہ بوقت بوائی نائٹروجن 25کلوگرام، فاسفورس 35کلوگرام اور پوٹاش 25 کلو گرام کھاد فی ایکڑ استعمال کی جائے۔علاوہ ازیں کاشتکار فصل سے جڑی بوٹیوں کے تدارک کیلئے 3 سے 4 مرتبہ مناسب وقت پر گوڈی کریں اور اس عمل کے دوران پودوں پر مٹی چڑھائیں تاکہ فصل کو نقصان سے بچایاجاسکے۔