امریکی اہلکار نے گن تانی اور کہا نیچے جھک جاو ورنہ گولی ماردوں گا، سنیل شیٹی

ہفتہ 1 مارچ 2025 10:40

ممبئی(اُردو پوائنٹ اخبارتازہ ترین - این این آئی۔ 01 مارچ2025ء)بھارتی اداکار سنیل شیٹی نے امریکا میں اپنے ساتھ پیش آنے والا ہولناک واقعہ بیان کرتے ہوئے کہاہے کہ امریکی پولیس اہلکار نے مجھ پر گن تان لی اور کہا نیچے جھک جاؤ ورنہ گولی ماردوں گا۔بھارتی میڈیا رپورٹ کے مطابق سنیل شیٹی نے ایک انٹرویو میں انکشاف کیا کہ نائن الیون کے بعد غلط فہمی میں امریکی اہلکار نے مجھ پر گن تان لی اور مجھ سے کہا نیچے جھک جاؤ ورنہ میں گولی ماردوں گا۔

انہوں نے کہا کہ واقعہ فلم کانٹے کی امریکا میں شوٹنگ کے دوران پیش آیا، امریکی اہلکار نے مجھے غلط فہمی میں ہتھکڑی لگاکر زمین پر ڈال دیا۔بھارتی اداکار سے زندگی حیرت انگیز واقعے سے متعلق پوچھے گئے سوال پر انہوں نے بتایاکہ ہم نائن الیون کے پہلے امریکا میں تھے۔

(جاری ہے)

سنیل شیٹی نے واقعے کے بارے میں بتاتے ہوئے کہا کہ ان دنوں میرے چہرے پر داڑھی تھی اور میں ہوٹل جارہا تھا، چابیاں میں کمرے میں بھول چکا تھا، تو میں نے چابی مانگنے کی کوشش کی تو غلط فہمی پیدا ہوگئی۔

اداکار نے کہا کہ مجھے لگا کہ وہ میری بات نہیں سمجھ رہے، تو میں نے اشارے میں اپنی بات کہی تو وہ میرے خلاف چلی گئی، وہ شخص فوراً ہی باہر بھاگ گیا اور پھر ہلچل مچ گئی اور سڑک پر کھڑی پولیس وہاں پہنچ گئی۔بھارتی اداکار نے کہا کہ پولیس اہلکار نے آتے ہی مجھ پر بندوق تان لی اور کہا نیچے جھک جاؤ ورنہ میں گولی ماردوں گا،اس صورتحال میں مجھے کچھ بھی سمجھ نہیں آرہا تھا کہ کیا ہورہا ہے۔انہوں نے کہا کہ میں گھٹنوں کے بل جھک گیا، انہوں نے میری ہاتھ میں ہتھکڑی لگادی، تب تک پروڈکشن والے بھی آگئے، پولیس کو بتایا گیا میں ایک ایکٹر ہوں۔