پاکستانی تاجرسعودی وژن 2030کے تحت دستیاب اقتصادی مواقعوں سے فائدہ اٹھائیں، سیف الرحمان

اتوار 2 مارچ 2025 12:10

لاہور (اُردو پوائنٹ اخبارتازہ ترین - اے پی پی۔ 02 مارچ2025ء) وفاقی ٹیکس محتسب کے کوآرڈینیٹر سیف الرحمان نے کہا ہے کہ پاکستانی تاجر 'سعودی وژن 2030' کے تحت دستیاب وسیع مواقع سے زیادہ سے زیادہ فائدہ اٹھائیں۔

(جاری ہے)

سیف الرحمان جو 10رکنی وفد کے ہمراہ سعودی عرب کے 15روزہ دورے پر ریاض میں ہیں نے اتوار کو اپنے ایک بیان میں سعودی عرب کے انقلابی اقتصادی منصوبے کے پوٹینشل کو اجاگر کرتے ہوئے کہا کہ اس کا مقصد سعودیہ کا تیل پر انحصار کم کرنا اور سیاحت، ٹیکنالوجی، بین الاقوامی معیار کے کھانوں و غذائی مصنوعات اور انفراسٹرکچر سمیت مختلف شعبوں میں ترقی کو فروغ دینا ہے۔

انہوں نے پاکستانی تاجروں پر زور دیا کہ وہ وژن 2030کے تحت سعودی عرب میں شراکت داری اور سرمایہ کاری کے مواقع سے فائدہ اٹھائیں کیونکہ یہ پاکستانی تاجروں کو کاروبار کے فروغ اور نئی منڈیوں تک رسائی کے مواقع فراہم کرتا ہے۔ سیف الرحمان نے کہا کہ سعودی تجارتی نمائشوں، کاروباری فورمز، اور نیٹ ورکنگ ایونٹس میں شرکت کے لیے بزنس کمیونٹی کی حوصلہ افزائی کی ضرورت ہے۔ انہوں نے حکومت پر زور دیا کہ وہ ان مواقع سے زیادہ سے زیادہ فائدہ اٹھانے کے لیے کردار ادا کرے اور تاجروں کو اس حوالے سے آگاہی اور سہولیات فراہم کرے۔