ملک فیروز خان نون بزنس سکول سرگودھا میں بنائے گئے نئے ایگزیکٹو کلاس روم کا افتتاح

پیر 3 مارچ 2025 19:29

سرگودھا (اُردو پوائنٹ اخبارتازہ ترین - اے پی پی۔ 03 مارچ2025ء) ملک فیروز خان نون بزنس سکول سرگودھا میں بنائے گئے نئے ایگزیکٹو کلاس روم کا افتتاح کر دیا۔افتتاح وائس چانسلر پروفیسر ڈاکٹر قیصر عباس، سرگودھا چیمبر آف کامرس کے صدر خواجہ یاسر قیوم اور معروف تاجر فاروق ساہنی نے کیا جبکہ اس کلاس روم کو الحاج طارق سعید ساہنی(مرحوم) کے نام سے منسوب کیا گیا ہے۔

افتتاحی تقریب میں ڈین فیکلٹی آف سوشل سائنسز پروفیسر ڈاکٹر مسعود سرور اعوان، ڈائریکٹر نون بزنس سکول پروفیسر ڈاکٹر عرفان شہزاد، ڈین فیکلٹی آف فارمیسی پروفیسر ڈاکٹر عثمان منہاس، ڈائریکٹر اورک پروفیسر ڈاکٹر احمد رضا بلال، ڈائریکٹر سٹوڈنٹ افیئرزڈاکٹر محمود الحسن سمیت نون بزنس سکول کے اساتذہ اور طلبہ بھی موجود تھے۔

(جاری ہے)

اس موقع پر وائس چانسلر پروفیسر ڈاکٹر قیصر عباس نے کہا کہ یونیورسٹی آف سرگودھا عالمی معیار کی تعلیمی و تحقیقی سرگرمیوں کو یقینی بنانے کے لیے تمام تر وسائل بروئے کار لا رہی ہے جبکہ ملک فیروز خان نون بزنس سکول کے نئے ایگزیکٹو کلاس روم کا اجراء بھی اسی سلسلہ کی ایک کڑی ہے۔

وائس چانسلر نے بتایا کہ یونیورسٹی آف سرگودھا اور سرگودھا چیمبر آف کامرس مل کر مقامی صنعت اورزراعت کو درپیش مسائل کا حل تلاش کرنے کے لیے مل کر کام کر رہے ہیں۔ اس موقع پر چیمبر آف کامرس نے ایگزیکٹو کلاس روم کے لیے دو نئے اے سی دینے کا بھی اعلان کیا اور کہا کہ سرگودھا یونیورسٹی کی تعلیمی و تحقیقی سرگرمیوں کے لیے چیمبر آف کامرس ہمیشہ تعاون کرتا رہے گا۔