آزادی کا دن ہمیں اپنے اسلاف کی قربانیوں کی یاد دلاتا ہے،گورنرسندھ

سینٹ پیٹرک ہائی اسکول میں جشن آزادی کی تقریب میں انتظامیہ اور بچوں کے ساتھ آزادی کا کیک بھی کاٹا

جمعرات 13 اگست 2026 21:39

آزادی کا دن ہمیں اپنے اسلاف کی قربانیوں کی یاد دلاتا ہے،گورنرسندھ

کراچی (اُردو پوائنٹ اخبارتازہ ترین - این این آئی۔ 13 اگست2026ء) گورنر سندھ سید محمد نہال ہاشمی نے کہا ہے کہ آزادی کا دن ہمیں اپنے اسلاف کی قربانیوں کی یاد دلاتا ہے۔اسلاف، قائدین اور بزرگوں کی لازوال قربانیوں کا مقصد آج کی نسل کو آزاد ملک میں سکون سے سانس لینے کا موقع دینا تھا۔آزادی اللہ تعالیٰ کی بہت بڑی نعمت ہے، اس کی قدر کرنا ہم سب کا قومی فریضہ ہے۔

ان خیالات کا اظہار انہو ں نے سینٹ پیٹرک ہائی اسکول میں جشن آزادی کے حوالے سے منعقدہ خصوصی تقریب سے خطاب کرتے ہوئے کیا۔ گورنرسند ھ نے مزید کہا کہ پاکستان کو ترقی کی راہ پر آگے لے جانا اب آپ بچوں کی ذمہ داری ہے۔آنے والے وقت میں آپ نے ہی پاکستان کی باگ دوڑ سنبھالنی ہے۔نوجوان خود کو مستقبل کے چیلنجز کے لیے تیار کریں۔

(جاری ہے)

ہر بچہ اپنے گھر میں کم از کم ایک پودا یا پھول ضرور لگائے۔

انہوں نے کہا کہ بچے اپنے گھروں، اسکول اور ماحول کو خوبصورت اور سرسبز بنائیں۔شجرکاری کے ذریعے پاکستان کو سرسبز و شاداب اور آلودگی سے پاک بنایا جاسکتا ہے۔ انہوں نے کہا کہ سینٹ پیٹرک ہائی اسکول پاکستان کے قدیم ترین اور معتبر ترین تعلیمی اداروں میں سے ایک ہے۔سینٹ پیٹرک ہائی اسکول نے ہمیشہ علم اور اخلاقیات کا پرچم بلند رکھا ہے۔سینٹ پیٹرک ہائی اسکول کے فارغ التحصیل طلبہ نے مختلف شعبوں میں ملک و قوم کا نام روشن کیا۔

انہوں نے کہا کہ سینٹ پیٹرک ہائی اسکول سے ذہین اور مایہ ناز طلبہ نے سیاست، بیوروکریسی، عدلیہ اور افواج سمیت مختلف شعبوں میں خدمات انجام دیں۔ سینٹ پیٹرک ہائی اسکول میں جشنِ آزادی کے حوالے سے خصوصی تقریب میں گورنرسندھ بطور مہمان خصوصی شریک تھے۔ گورنر سندھ نے اسکول انتظامیہ اور بچوں کے ہمراہ آزادی کا کیک کاٹا۔ یومِ آزادی کے موقع پر بچوں نے ملی نغمے اور شاندار ٹیبلو پیش کیے۔پرنسپل ریورنڈ فادر ماریو اینجیلو روڈریگز نے استقبالیہ خطاب کیا۔