ٹرمپ کے ہاتھ پر ایک اور زخم نئی تصویر نے ہلچل مچا دی

چند دن پہلے ان کے دائیں ہاتھ کی پشت پر ایک بڑا نیل نظر آیا تھا اور اب ہتھیلی پر 2 گہرے سرخ نشانات دیکھے گئے

منگل 4 مارچ 2025 22:45

واشنگٹن (اُردو پوائنٹ اخبارتازہ ترین - آن لائن۔ 04 مارچ2025ء)امریکی صدر ڈونلڈ ٹرمپ کے ہاتھ پر ایک بار پھر نئے نشانات دیکھے گئے ہیں، جن سے ان کی صحت کے بارے میں خدشات جنم لے رہے ہیں۔ چند دن پہلے ان کے دائیں ہاتھ کی پشت پر ایک بڑا نیل نظر آیا تھا اور اب ہتھیلی پر 2 گہرے سرخ نشانات دیکھے گئے ہیں۔یہ نشانات اس وقت دیکھے گئے جب صدر ٹرمپ سرمایہ کاری سے متعلق ایک تقریب سے خطاب کر رہے تھے۔

ان نشانات کو دیکھ کر سوشل میڈیا پر قیاس آرائیاں شروع ہو گئیں کہ آیا یہ زخم، نیل یا کسی بیماری کی علامت ہیں۔ٹرمپ کے ہاتھ پر ان نئے نشانات کے بعد سوشل میڈیا صارفین نے سوالات اٹھانا شروع کر دیے۔ایک صارف نے لکھا کہ ٹرمپ کے دائیں ہاتھ کی ہتھیلی پر ایک بار پھر زخم نظر آ رہا ہے، وہ صحت مند نہیں ہیں اور وہ خود بھی یہ جانتے ہیں۔

(جاری ہے)

ایک اور صارف نے سوال کیا کہ ڈونلڈ ٹرمپ کے ہاتھ پر یہ عجیب نشانات کیا ہیں کسی نے خدشہ ظاہر کرتے ہوئے لکھا کہ کیا یہ ٹرمپ کے ہاتھ پر گینگرین (Gangrene) کا نشان ہی یہ مسئلہ اکثر ڈیمنشیا کے مریضوں کو ہوتا ہے۔

ٹرمپ کے ہاتھ پر بار بار نظر آنے والے نشانات پر وضاحت دیتے ہوئے وائٹ ہاؤس کی پریس سیکریٹری کیرولین لیویٹ نے کہا کہ صدر ٹرمپ عوام کے آدمی ہیں، وہ روزانہ لوگوں سے ملتے ہیں اور مسلسل کام میں مصروف رہتے ہیں، ان کے ہاتھ پر نظر آنے والے نیل صرف اس بات کا ثبوت ہیں کہ وہ ہر روز ہزاروں لوگوں سے ہاتھ ملاتے ہیں۔