شہنشاہ کامیڈی امان اللہ کو مداحوں سے بچھڑے 5 برس بیت گئے

مسلسل 42 سال تک لوگوں کے دلوں پر راج کیا، انہیں پرائیڈ آف پرفارمنس سمیت متعدد ایوارڈز سے نوازا گیا

جمعرات 6 مارچ 2025 12:44

شہنشاہ کامیڈی امان اللہ کو مداحوں سے بچھڑے 5 برس بیت گئے

لاہور(اُردو پوائنٹ اخبارتازہ ترین - این این آئی۔ 06 مارچ2025ء)اداس چہروں پر مسکراہٹ بکھیرنے والے شہنشاہ کامیڈی، تھیٹر کے بے تاج بادشاہ امان اللہ خان کو مداحوں سے بچھڑے پانچ برس بیت گئے۔کامیڈی کنگ نے بھارت سمیت مختلف ممالک میں اپنی صلاحیتوں کے جوہر دکھائے اور پاکستان کا نام روشن کیا، انہوں نے مسلسل 42 سال تک لوگوں کے دلوں پر راج کیا، انہیں پرائیڈ آف پرفارمنس سمیت متعدد ایوارڈز سے نوازا گیا۔

(جاری ہے)

شوبز کی دنیا میں راج کرنے والے کنگ آف کامیڈی امان اللہ خان کی عمر قہقہے بکھیرتے گزری، اداکار امان اللہ نے کامیڈین کے طور پر پوری دنیا میں شہرت پائی، وہ مختلف لوگوں کی آوازوں کی نقالی کے بھی ماہر تھے۔امان اللہ خان 1950 کو لاہورمیں پیدا ہوئے، امان اللہ خان نے 1976 میں پہلی بار سٹیج پر کام کیا اور پھر مڑ کر نہیں دیکھا، امان اللہ خان کا شمار پاکستان کے بہترین مزاحیہ اداکاروں میں ہوتا تھا ان کو اعزاز حاصل رہا کہ انہوں نے لگا تار 860 دن لائیو تھیٹر پر پرفارمنس دی۔امان اللہ خان 6 مارچ 2020 کو اپنے مداحوں کو اداس کر گئے تھے۔