Live Updates

میو ہسپتال والے معاملے پراب تک انسانی غلطی سامنے آرہی ہے،عظمیٰ بخاری

غلط انجکشن لگنے سے ہسپتال میں ہونے والی اموات پر وزیراعلیٰ پنجاب مریم نواز افسردہ ہیں اور انہوں نے تحقیقاتی کمیٹی بنا دی ہے، میو ہسپتال کے ایم ایس نے نوٹس سے بچنے کیلئے استعفیٰ دیا، صوبائی وزیر کی پریس کانفرنس

فیصل علوی پیر 10 مارچ 2025 15:35

میو ہسپتال والے معاملے پراب تک انسانی غلطی سامنے آرہی ہے،عظمیٰ بخاری

لاہور(اردوپوائنٹ اخبار تازہ ترین۔10 مارچ 2025)صوبائی وزیر اطلاعات عظمیٰ بخاری نے کہا ہے کہ میو ہسپتال والے معاملے پراب تک انسانی غلطی سامنے آرہی ہے، میو ہسپتال میں غلط انجکشن لگنے سے 2 مریض جاں بحق ہوئے، وزیراعلیٰ پنجاب مریم نواز اس واقعہ پر بہت افسردہ ہیں انہوں نے واقعہ کا نوٹس لے کر تحقیقاتی کمیٹی بنا دی ہے،لاہور میں پریس کانفرنس کرتے ہوئے صوبائی وزیر کا کہنا ہے کہ میو ہسپتال کے ایم ایس نے نوٹس سے بچنے کیلئے استعفیٰ دیا۔

میو ہسپتال کے پاس ایک ارب 33 کروڑ کے فنڈز اب بھی موجود ہیں۔ مریم نواز کے میو ہسپتال کے دورے کے دوران ایم ایس کو ہٹانے پر پروپیگنڈہ کیا گیا کہ ایم ایس نے فنڈز کی کمی کی وجہ سے پہلے ہی استعفیٰ دے دیا تھا۔ یہ کہنا غلط ہے کہ فنڈز کی کمی کی وجہ سے میو ہسپتال کے ایم ایس نے استعفیٰ دیا۔

(جاری ہے)

کیونکہ میو ہسپتال کے پاس ایک ارب 33 کروڑ کے فنڈز اب بھی موجود ہیں۔

دو لاکھ کے قریب اسٹاک میں برنولا موجود ہے اور سٹاک موجود ہونے کے باوجود لوگ باہر سے خریدتے ہیں تو کس کا قصور ہے۔انہوں نے کہا کہ صوبائی محتسب پنجاب نے صحت کے معاملے پر ایک نوٹس لیا اور ایم ایس کو سوالات بھیج کر جوابات طلب کئے لیکن ایم ایس نے جواب نہیں دیا اور غلط زبان استعمال کی۔ غلط زبان کے استعمال پر صوبائی محتسب نے توہین کا نوٹس جاری کیا۔

لیکن ڈاکٹر صاحب نے نوٹس سے بچنے کیلئے استعفیٰ دیدیا۔ پنجاب میں صحت کے بجٹ میں 500 فیصد سے زائد اضافہ ہوا ہے۔صوبے بھر میں صحت کی سہولیات کی فراہمی کیلئے کام کر رہے ہیں۔ پریس کانفرنس کے دوران گفتگو کرتے ہوئے صوبائی وزیر اطلاعات عظمیٰ بخاری کا مزید کہنا تھا کہ میو ہسپتال کے دورے پر مریم نواز نے سخت احکامات دیئے۔ وزیراعلیٰ پنجاب مریم نواز کو تشہیر کی ضرورت نہیں ہے۔

صحت کے شعبے میں کسی کو رعایت نہیں دی جا رہی اور عوام کو صحت کی سہولتوں کی فراہمی مریم نواز کی اولین ترجیح ہے۔ وزیر اعلیٰ مریم نواز نے میو ہسپتال کا دورہ کیا اور اس دوران ایم ایس اور ڈرگ سے وابستہ لوگوں کو عہدوں سے ہٹایا۔ وزیر اعلیٰ نے میو ہسپتال میں ایک تحقیقاتی کمیٹی بھی بنائی جس کی آج رپورٹآ جائے گی۔ان کا یہ بھی کہنا تھا کہ س کو کوئی کام نہیں ملتا وہ لاشوں پر سیاست کی کوشش کرتا ہے۔ یوٹیوبرز ملک کو ٹیومر کی طرح لگ چکے ہیں۔بزدارکے دور حکومت میں پنجاب کے ہسپتالوں کا کوئی حال نہیں تھا۔پی ٹی آئی دور میں سوائے لوٹ مار کے کچھ نہیں کیا گیا۔