اقوام متحدہ کا منشور 80 سال بعد بھی ایک جاوداں معجزہ ہے، گوتیرش

اسلام آباد (اُردو پوائنٹ ۔ UN اردو۔ 25 جون 2025ء) اقوام متحدہ کے چارٹر کی تاریخی دستاویز نیویارک میں واقع ادارے کے ہیڈکوارٹر میں واپس آ گئی ہے جس پر 1945 میں امریکہ کے شہر کیلی فورنیا میں دستخط کیے گئے تھے۔

ہیڈکوارٹر میں 'سان فرانسسکو کے جذبے کا احیا' کے عنوان سے منعقدہ ملٹی میڈیا نمائش میں آج سیکرٹری جنرل انتونیو گوتریش نے چارٹر کی واپسی کا خیرمقدم کیا جو دراصل اقوام عالم کا آپس میں امن سے رہنے اور ایک دوسرے سے وقار اور تعاون پر مبنی سلوک روا رکھنے کا وعدہ ہے۔

اس موقع پر سیکرٹری جنرل نے کہا کہ تقریباً 80 سال پہلے منظور کیا جانے والا چارٹر اقوام متحدہ کا آغاز تھا جو ایسے تصورات اور اصولوں پر مشتمل ہے جن پر عملدرآمد کے لیے دنیا روزانہ کام کرتی ہے۔

(جاری ہے)

اقوام متحدہ دور حاضر کا ایک زندہ معجزہ ہے اور اس کے مردو خواتین روزانہ اور ہر جگہ اس معجزے کی تجسیم پیش کرتے ہیں۔

یہ نمائش لوگوں کے لیے اقوام متحدہ کے قیام سے متعلق تصاویر، ویڈیو اور ایسی دستاویز کو دیکھنے کا موقع ہے جن کے ذریعے یہ عالمی ادارہ وجود میں آیا۔

جنگ سے امن تک

دوسری عالمی عظیم کے بعد تقریباً 50 ممالک کے نمائندے ایک ایسا ادارہ قائم کرنے کے لیے امریکہ کے شہر سان فرانسسکو میں جمع ہوئے جو دنیا کو اس قدر تباہ کن درجے کی جنگ سے ہمیشہ کے لیے تحفظ دے سکے اور امن، سفارت کاری، مساوات اور خوشحالی کے حصول میں معاون ہو۔

چارٹر پر 26 جون 1945 کو دستخط کیے گئے تھے۔ تاہم اس کا نفاذ دستخطی ممالک کے قانون ساز اداروں کی توثیق کے بعد 24 اکتوبر 1945 کو عمل میں آیا۔

توثیق کے بعد اس چارٹر نے دیگر بین الاقوامی معاہدوں کی راہ بھی ہموار کی جن میں انسانی حقوق سے متعلق 1948 کا عالمگیر اعلامیہ اور 2024 کا معاہدہ برائے مستقبل بھی شامل ہیں۔

نمائش کے موقع پر اقوام متحدہ کی جنرل اسمبلی کے صدر فائلیمن یانگ نے کہا کہ نہ ختم ہونے والی جنگوں اور کئی طرح کے بحرانوں کا سامنا کرتی دنیا میں یہ چارٹر اور اس کے اصول بات چیت، سفارت کاری تعاون اور یکجہتی کی صورت میں بہتر، مزید پرامن اور خوشحال مستقبل کی راہ سجھاتے ہیں۔

ان کا کہنا تھا کہ گزشتہ آٹھ دہائیوں نے اس چارٹر کی دیرپا میراث کو ثابت کیا۔ اس نے سالہا سال تک انسانی ترقی میں مدد دی، نوآبادیات کے خاتمے کے لیے بین الاقوامی اقدامات کو رہنمائی مہیا کی، انسانی حقوق کا تحفظ کیا اور انصاف و پائیدار ترقی کو فروغ دیا۔

ہر دور میں کارآمد دستاویز

نمائش میں چارٹر کو ماضی کی ایسی دستاویز کے طور پر دکھایا گیا ہے جو موجودہ زمانے میں بھی اتنی ہی کارآمد ہے اور مستقبل کی تشکیل میں بھی مدد دے گی۔

فائلیمن یانگ نے کہا کہ مستقبل کو دیکھتے ہوئے اپنے ماضی کو یاد رکھنا، اپنی کامیابیوں پر خوشی ہونا اور اقوام متحدہ کے چارٹر کی بنیاد پر مستقبل کو تعمیر کرنا دانشمندی ہو گی۔

ان کا کہنا تھا کہ آج دنیا کو پرانے مسائل کے علاوہ موسمیاتی تبدیلی اور جدید ٹیکنالوجی کی صورت میں نئے مسائل کا سامنا بھی ہے۔ اگر تمام ممالک اقوام متحدہ کے چارٹر کے جذبے اور امن کے حوالے سے اس میں کیے گئے وعدوں کو ساتھ لے کر آگے بڑھنا چاہتے ہیں تو یہ اس کے لیے موثر رہنمائی فراہم کر سکتا ہے۔