وزیر اعلی خیبر پختونخوا سے ہنگو کے فٹبال پلئیر محمد ریاض کی ملاقات،کھلاڑی کو 10 لاکھ روپے کا امدادی چیک دیا

جمعرات 13 مارچ 2025 16:20

پشاور (اُردو پوائنٹ اخبارتازہ ترین - اے پی پی۔ 13 مارچ2025ء) وزیر اعلی خیبر پختونخوا علی امین گنڈاپور سے ضلع ہنگو سے تعلق رکھنے والے فٹبال پلئیر محمد ریاض نے ملاقات کی ہے ۔ وزیراعلیٰ ہائوس پشاور کے مطابق محمد ریاض جنہوں نے فٹبال کے بین الاقوامی مقابلوں میں پاکستان کی نمائندگی کی ہے کے بارے میں گزر بسر کے لئے جلیبی کی دکان پر کام کرنے کی وڈیو سوشل میڈیا پر وائرل ہونے کے بعد علی امین گنڈاپور نے محمد ریاض کو ملاقات کے لئے بلا یا ۔

وزیر اعلی نے ملاقات میں محمد ریاض کو 10 لاکھ روپے کا امدادی چیک دیا ہے ۔وزیر اعلیٰ نے محمد ریاض کو محکمہ سپورٹس کے تحت فٹبال کوچ بھی مقرر کیا۔ صوبائی وزیر کھیل فخر جہاں بھی اس موقع پر موجود تھے۔ اس موقع پر وزیراعلی خیبرپختونخوا علی امین گنڈاپور نے کہا کہ محمد ریاض جیسے کھلاڑی ہمارا اثاثہ ہیں، انہیں سرپرستی کی ضرورت ہے، موجودہ صوبائی حکومت ایسے باصلاحیت نوجوانوں کی بھر پور حوصلہ افزائی کرے گی۔

(جاری ہے)

انہوں نے کہا کہ صوبائی حکومت بعض مخصوص کھیلوں کی بجائے ہر قسم کے کھیلوں کو فروغ دینے کے لئے اقدامات کر رہی ہے، ہم دیگر کھیلوں کے ساتھ ساتھ علاقائی اور روایتی کھیلوں کے فروغ کے لئے سرگرمیاں منعقد کر رہے ہیں، ان سرگرمیوں کے ذریعے نوجوانوں کو اپنی صلاحیتوں کو اجاگر کرنے کے مواقع ملیں گے۔انہوں نے کہا کہ موجودہ صوبائی حکومت باصلاحیت کھلاڑیوں کی نی صرف حوصلہ افزائی کرے گی بلکہ انہیں ہر ممکن سپورٹ بھی فراہم کرے گی۔محمد ریاض کا کہنا ہے کہ ملاقات کے لئے مدعو کرنے اور بھر پور معاونت کرنے پر وزیر اعلی علی امین گنڈاپور کا مشکور ہوں۔