یونیورسٹی آف بلوچستان میں مالی استحکام کو یقینی بنانے کیلئے اہم اقدام، یونیورسٹی فنانس کمیشن نے فروری 2025 کی تنخواہوں کے اجرا کے حکم کی منظوری دیدی

جمعرات 13 مارچ 2025 23:27

کوئٹہ (اُردو پوائنٹ اخبارتازہ ترین - اے پی پی۔ 13 مارچ2025ء) یونیورسٹی آف بلوچستان میں مالی استحکام کو یقینی بنانے کے لیے ایک اہم اقدام کے طور پر یونیورسٹی فنانس کمیشن نے فروری 2025 کی تنخواہوں کے اجرا کے حکم کی منظوری دے دی ہے۔ صوبائی وزیر خزانہ میر شعیب نوشیروانی ، راحیلہ حامد درانی صوبائی وزیر تعلیم بلوچستان،سیکرٹری خزانہ عمران زرقون ، سیکرٹری ہائر ایجوکیشن صالح بلوچ اور یونیورسٹی فنانس کمیشن نے یونیورسٹی آف بلوچستان کے 2025 اور 2026 کے بجٹ کی منظوری بھی دے دی ہے اور پنشن ادائیگیوں کی ذمہ داریوں کی توثیق کی ہے، جو اب وزیر اعلیٰ بلوچستان کو حتمی منظوری کے لیے بھیج دی جائیں گی۔

یہ فیصلے یونیورسٹی کے وائس چانسلر پروفیسر ڈاکٹر ظہور احمد بازئی کی مسلسل کوششوں کا نتیجہ ہیں، جنہوں نے یونیورسٹی کے مالی معاملات کو حل کرنے کے لیے محنت کی،ان منظوریوں کے بعد یونیورسٹی کو فروری 2025 کے بعد کسی بھی مالی یا تنخواہ کے مسائل کا سامنا نہیں ہوگا۔

(جاری ہے)

پروفیسرڈاکٹرظہور احمد بازئی نے فنانس کمیشن کا شکریہ ادا کیا اور کہا کہ یہ اقدامات وقت پر تنخواہوں کی ادائیگی، مالی شفافیت کو برقرار رکھنے اور یونیورسٹی کی ترقی کے لیے اہم ہیں،یہ سنگ میل یونیورسٹی آف بلوچستان کے تعلیمی اور انتظامی کاموں کو مزید مضبوط بنانے کی طرف ایک مثبت قدم ثابت ہوگا۔