انٹرمیڈیٹ حصہ اول و حصہ دوم:سرکاری نجی و نجی تعلیمیادارون کے اہل امیدواروں کو فارمز جمع کرانے کا ایک موقع

کراچی (اُردو پوائنٹ اخبارتازہ ترین - این این آئی۔ 14 مارچ2025ء) اعلی ثانوی تعلیمی بورڈ کراچی نے چیئرمین سید شرف علی شاہ کی ہدایت پر طلبہ کے وسیع تر مفاد میں انٹرمیڈیٹ حصہ اول و حصہ دوم (فریش اینڈ فیلیئر)کے سالانہ امتحانات برائے 2025 میں شرکت کے خواہشمند سائنس پری میڈیکل، پری انجینئرنگ، سائنس جنرل اور ہوم اکنامکس گروپس کے سرکاری و نجی تعلیمی اداروں کے اہل اور خواہشمند ریگولر امیدواروں کو امتحانی فارمز جمع کروانے کا ایک اور موقع دیتے ہوئے بروز پیر 17 مارچ سے بروز بدھ 9 اپریل 2025 تک نئی تاریخوں کا اعلان کردیا ہے۔

امتحانی فارمز انٹربورڈ کراچی کی آفیشل ویب سائٹ [email protected] سے ڈان لوڈ کیے جاسکتے ہیں۔ تفصیلات کے مطابق انٹرمیڈیٹ حصہ او ل و حصہ دوم کے سائنس پری میڈیکل، پری انجینئرنگ، سائنس جنرل، ہوم اکنامکس گروپس کے سالانہ امتحانات برائے 2025 میں شرکت کے اہل گورنمنٹ کالجوں اور ہائر سیکنڈری اسکولوں کے فریش ریگولر امیدوار اپنے امتحانی فارم بغیر کسی فیس کے بروز پیر 17 مارچ سے بروز بدھ 9 اپریل تک اپنے تعلیمی اداروں میں جمع کرواسکتے ہیں۔

(جاری ہے)

کالجز اور ہائیر سیکنڈری اسکولز یہ امتحانی فارمز بروز جمعرات 10اپریل 2025 کو اپنے نمائندوں کے ذریعہ بورڈ آفس میں جمع کروانے کے پابند ہوں گے۔ رواں سال بھی وزیراعلی سندھ کی ہدایت کے مطابق تمام گورنمنٹ کالجز اور ہائر سیکنڈری اسکولوں کے ایسے طلبا کی امتحانی فیس معاف کردی گئی ہے جو پہلی دفعہ انٹرمیڈیٹ حصہ اول یا حصہ دوم کے امتحانات میں شرکت کررہے ہیں لہذا گورنمنٹ تعلیمی اداروں کے طلبا بغیر کسی فیس کے امتحانی فارمز اپنے تعلیمی اداروں میں جمع کرواسکتے ہیں۔

اسی طرح انٹرمیڈیٹ حصہ دوم اور حصہ اول و دوم باہم کے سائنس پری میڈیکل، پری انجینئرنگ، سائنس جنرل اور ہوم اکنامکس گروپس کے سالانہ امتحانات برائے 2025 میں شرکت کے اہل گورنمنٹ کالجوں اور ہائر سیکنڈری اسکولوں کے ایسے ریگولر امیدوار جوپہلے ان امتحانات میں شریک ہوئے لیکن ناکام رہے اپنے امتحانی فارم ایک ہزار روپے لیٹ فیس کے ساتھ بروز پیر 17مارچ سے بروز بدھ 9 اپریل 2025 تک اپنے تعلیمی اداروں میں جمع کرواسکتے ہیں۔

کالجز اور ہائیرسیکنڈری اسکولز یہ امتحانی فارم اور فیسوں کے پے آرڈرز بروز جمعہ 11اپریل 2025 تک اپنے نمائندوں کے ذریعہ بورڈ آفس کے اکانٹس سیکشن میں جمع کروانے کے پابند ہوں گے۔شیڈول کے مطابق سائنس پری میڈیکل، پری انجینئرنگ، سائنس جنرل اور میڈیکل ٹیکنالوجی کے سالانہ امتحانات 2025 میں شرکت کے اہل پرائیویٹ کالجوں اور ہائر سیکنڈری اسکولوں کے ریگولر امیدوار اپنے امتحانی فارم ایک ہزار روپے لیٹ فیس کے ساتھ بروز پیر 17مارچ سے بروز بدھ 9 اپریل 2025 تک اپنے تعلیمی اداروں میں جمع کرواسکتے ہیں۔

پرائیویٹ کالجز اور ہائر سیکنڈری اسکولز یہ امتحانی فارمز بمع فیسوں کے پے آرڈرز بروز جمعہ 11اپریل 2025 کو اپنے نمائندوں کے ذریعہ بورڈ آفس کے اکانٹس سیکشن میں جمع کروانے کے پابند ہوں گے۔تعلیمی اداروں کو اپنے جمع کروائے جانے والے امتحانی فارمز کی مکمل فہرست کی دو کاپیاں بھی اپنے ادارے کے سربراہ کے دستخط کے ساتھ جمع کروانا ہوں گی۔