پاکستان کی جانب سے یونیسکو میں جشن "نوروز" بھرپور انداز میں منایا گیا

جمعرات 20 مارچ 2025 01:00

پیرس (اُردو پوائنٹ اخبارتازہ ترین - اے پی پی۔ 20 مارچ2025ء) پاکستان نےیونیسکو ہیڈ کوارٹر میں بارہ دیگر ممالک کے ساتھ مل کر اہم ثقافتی تہوار جشن "نوروز" منایا۔ نوروز کے تہوار کے شاندار ورثے کو بھرپور انداز میں اجاگر کرنے کی حامل اس تقریب میں سفارت کاروں، معزز شخصیات اور کمیونٹی کے اراکین نے شرکت کی ۔ پیرس میں پاکستانی سفارتخانہ کی جانب سے جاری پریس ریلیز کے مطابق تقریب میں شریک ممالک کے متنوع رسم و رواج اور روایات کو نمایاں کرتے ہوئے روایتی موسیقی ، ثقافتی پرفارمنس اور کھانے پیش کئے گئے ۔

مہمانوں کی تواضع روایتی پاکستانی کھانوں کی دعوت سے کی گئی، جس میں شامی کباب، خوشبودار باسمتی بریانی اور فرحت بخش لسی شامل تھی جن کے ذریعے یونیسکو میں پاکستان کے لذیذ کھانوں کی ایک جھلک پیش کی گئی۔

(جاری ہے)

واضح رہے کہ نوروز، موسم بہار کی آمد کا تہوار، دنیا بھر میں امن، دوستی اور تجدید کی علامت ہے۔ اسے یونیسکو نے"غیر مرئی ثقافتی ورثہ " کے طور پر تسلیم کیا ہے اور اسے پاکستان نے بارہ دیگر ممالک کے ساتھ مشترکہ طور پر رجسٹر کیا ہے۔

یونیسکو میں منعقدہ اس تقریب نے ثقافتی افہام و تفہیم کو فروغ دینے اور عالمی سطح پر نوروز کی اہمیت کو نمایاں کرنے کے لیے پاکستان کے عزم کو اجاگر کیا۔ جشن نوروز کی تقریبات نے نہ صرف ثقافتی تنوع کی اہمیت کو اجاگر کیا بلکہ پکوان اور موسیقی کے حوالے سے ممالک کے درمیان اتحاد کے جذبے کو بھی تقویت دی۔\932