لورالائی ،دہشت گردی کے خلاف قوم حکومت اور عسکری قیادت ایک پیج پر ہیں، مسلم لیگی رہنما

جمعرات 20 مارچ 2025 11:28

لورالائی (اُردو پوائنٹ اخبارتازہ ترین - اے پی پی۔ 20 مارچ2025ء) مسلم لیگ ن کے مرکزی رہنما ایم این اے سردار محمد یعقوب خان ناصر نے کہا ہے کہ ملک کی سلامتی سب سے زیادہ اہمیت رکھتی ہے پاکستان ہے تو ہم ہیں۔ دہشت گردی کے ایشو پر پوری قوم عسکری اور قومی قیادت نے فیصلہ کن فیصلہ سازی کا فیصلہ کر لیا ہے آج پوری قوم ملک سے دہشت گردی کے ناسور کے خاتمے کے لئے متحد ہے اور موجودہ حکومت کی بھرپور حمایت کا عزم مسمم رکھتی ہے۔

ضرورت اس امر کی ہے کہ عوام اپنی صفوں میں چھپے ملک دشمن عناصر کو پہچانیں جو قوم میں تفرقہ پیدا کرکے اپنے مکروہ عزائم کی تکمیل چاہتے ہیں ،انہوں نے کہا کہ پاکستانی عوام کو دہشت گردی کے اس ناسور سے چھٹکارا دلانے کے علاوہ کوئی آپشن نہیں ہے اور ہم شہید ہونے والے معصوم لوگوں کا خون رائیگاں نہیں جانے دیں گے۔

(جاری ہے)

انہوں نے کہا کہ پوری پاکستانی قوم دہشت گردی کے خلاف سیسہ پلائی دیوار کی طرح اپنی فوج کے ساتھ کھڑی ہے انہوں نے کہا کہ ہمیں آج عہد کرنا ہوگا کہ ہم جیسے اپنے گھر سے محبت کرتے ہیں ایسے ہی اپنے وطن سے کریں گے تاکہ دشمنوں کے منصوبوں کو ناکام بنایا جا سکے ۔

انہوں نے کہا کہ پاکستان کے تحفظ کے لئے اپنے سیاسی اور ذاتی مفادات بھلا کر اور یک زباں ہو کر ایک بیانیہ اپنانا ہوگا ،تاکہ معاشرے کے ان ناسوروں کا قلع قمع کیا جا سکے۔انہوں نے گزشتہ روز ژوب کے علاقہ سمبازہ میں بارودی سرنگ دھماکے میں میجر سعد اور ایک سپاہی کی شہادت پر افسوس اور گہرے دکھ کا اظہار کیا اور انکے خاندان سے دلی تعزیت کا اظہار کیا۔\378